“Real” bosh murabbiyi Alvaro Arbeloa jamoa Chempionlar ligasi chorak finalida “Bavariya”ga umumiy hisobda 4:6 mag‘lub bo‘lib, musobaqani tark etgach, o‘z kelajagi va murabbiylik falsafasi haqida ochiq fikr bildirdi.
Arbeloa o‘z so‘zlarida murabbiylik lavozimiga kelganidan beri hech qachon kimgadir o‘zini isbotlashni asosiy maqsad qilmaganini taʼkidladi. Uning aytishicha, u uchun eng muhim narsa — maydondagi futbolchilarga maksimal darajada yordam berish va jamoani rivojlantirish bo‘lgan:
— "Bu lavozimni egallaganimdan beri murabbiy sifatida o‘z darajamni kimgadir isbotlashni maqsad qilmaganman. Men hech qachon o‘yinlarni aynan qarorlarim bilan yutishni istamaganman, asosiy maqsadim maydondagi futbolchilarga yordam berish bo‘lgan", — dedi Arbeloa.
U shuningdek, “Bavariya” (Vensan Kompani), “Manchester Siti” (Pep Gvardiola) va “Atletiko” (Diyego Simeone) kabi Yevropaning eng kuchli klublariga qarshi o‘yinlarni misol qilib keltirdi. Uning fikricha, bu jamoalarning har biri o‘z murabbiyi uslubini aniq aks ettiradi:
— "Biz Vensan Kompani boshqarayotgan “Bavariya”, Pep Gvardiola qo‘l ostidagi "Manchester Siti", Diyego Simeone rahbarligidagi “Atletiko” kabi ko‘plab kuchli jamoalarga qarshi o‘ynadik. Menimcha, Yevropadagi aksariyat jamoalar o‘z murabbiyining uslubini aks ettiradi", — dedi Arbeloa.
Arbeloa Yevropa maydonlaridagi aksariyat jamoalarda murabbiyning taʼsiri katta ekanini aytdi, biroq o‘zining “Real”dagi taʼsiri qay darajada bo‘lganini aniq baholash qiyinligini ham tan oldi. U hatto bu taʼsir baʼzi yirik klublarnikiga qaraganda kamroq bo‘lishi mumkinligini inkor etmadi:
— "Mening taʼsirim jamoamda qay darajada ko‘ringani yoki buning ulushi qancha bo‘lganini aniq bilmayman. Ehtimol, bu men yuqorida misol keltirgan jamoalarga nisbatan ancha kamroqdir", — dedi Arbeloa.
Shu bilan birga, u “Kastilya”da ishlagan davriga nisbatan ham farqlar borligini qayd etdi va har bir bosqich o‘ziga xos tajriba berganini taʼkidladi:
— "Balki bu taʼsir men “Kastilya”da ishlagan paytdagidan ham pastroq bo‘lgandir. Men har doim klubga qo‘limdan kelgancha yordam berishga harakat qilganman va bu oxirigacha shunday davom etadi", — dedi Arbeloa.
Yakunda Arbeloa har doim klub manfaati uchun bor kuchini berganini va bu yo‘lda hali ham to‘liq sadoqat bilan ishlashda davom etishini bildirdi.
“Zamin”ni Telegramʻda oʻqing!
