Madridning “Real” klubida murabbiylar shtabi atrofida noaniqlik kuchayib bormoqda va jamoa rahbariyati yangi bosh murabbiy variantlarini ko‘rib chiqishga kirishgan. Bu haqda L‘Équipe nashri xabar bermoqda.
Manbalarga ko‘ra, jamoaning hozirgi ustozi Alvaro Arbeloa atrofidagi vaziyat barqaror emas. Bunga asosiy sabab sifatida “Real”ning so‘nggi natijalardagi tushkunliklari, jumladan Chempionlar Ligasidan chiqib ketishi va Ispaniya chempionatida chempionlik poygasida orqada qolishi ko‘rsatilmoqda.
Shu bois klub rahbariyati murabbiylar korpusida ehtimoliy o‘zgarishlarni jiddiy muhokama qilmoqda. Agar qaror amalga oshirilsa, “Real” uchun asosiy nomzodlar sifatida bir nechta mashhur mutaxassislar ko‘rib chiqilmoqda.
Shular qatorida Italiyaning “Milan” klubini boshqarayotgan Massimiliano Allegri hamda hozirda AQSH terma jamoasi ustozi sifatida faoliyat yuritayotgan Maurisio Pochettino nomlari alohida qayd etilmoqda.
Shuningdek, avvalroq Madrid klubi Fransiya terma jamoasini 2026 yilgi jahon chempionatidan so‘ng tark etishi kutilgan Didye Desham nomzodini ham muhokama qilgani aytilgan edi. Bu esa “Real”ning yangi davr uchun keng qamrovli reja tuzayotganini ko‘rsatadi.
Qisqasi, “Real” muhim qarorlar ostonasi turibdi. Klub kelajagi va natijalar barqarorligi aynan yangi murabbiy tanloviga bog‘liq bo‘lib qolmoqda. Muxlislar esa Madridda qanday o‘zgarishlar yuz berishini intiqlik bilan kuzatmoqda.
“Zamin”ni Telegramʻda oʻqing!
