«Liverpul» bosh murabbiyi Arne Slot hujumchi Ugo Ekitikening Axilles payi uzilgani sababli muvaffaqiyatli operatsiya qilinganini tasdiqladi. Fransiyalik futbolchi Yevropa musobaqalari doirasida o'zining sobiq jamoasi «PSJ»ga qarshi bahsda og'ir jarohat olgan edi. Tibbiy ko'riklar natijasiga ko'ra, hujumchi kamida to'qqiz oy davomida maydonga tusha olmaydi. Bu haqda Goal.com xabar beradi.
Ushbu jarohat Ekitikeni nafaqat joriy mavsumning qolgan qismidan, balki 2026-yilgi Jahon chempionatidan ham mahrum qildi. Shuningdek, u kelasi mavsumning katta qismini o'tkazib yuborishi kutilmoqda. Murabbiy Slotning ta'kidlashicha, operatsiya yaxshi o'tgan bo'lsa-da, to'liq tiklanish uchun uzoq va mashaqqatli yo'lni bosib o'tish talab etiladi.
«Operatsiya muvaffaqiyatli yakunlandi, biroq bunday uzoq reabilitatsiya jarayonida ko'plab bosqichlarni bosib o'tish kerak. Mutaxassislar buni bir necha oy davom etishini aytishmoqda. U xuddi uzoq vaqt safdan chiqqan boshqa o'yinchilar kabi yanada kuchli bo'lib qaytadi», — dedi Arne Slot matbuot anjumanida.
Hozirda «Liverpul» tarkibida jarohatlar bilan bog'liq vaziyat murakkablashmoqda. Darvozabon Giorgi Mamardashvili tizzasidan jarohat olgan bo'lsa, Alisson Bekkerda mushaklar bilan bog'liq muammolar kuzatilmoqda. Jamoa shanba kuni «Kristal Pelas»ga qarshi o'yinda darvozaga Freddi Vudmanni qo'yishga majbur bo'lishi mumkin.
Angliya chempionatida beshinchi o'rinda borayotgan «Liverpul» uchun Yevropa Chempionlar ligasi yo'llanmasini qo'lga kiritish muhim vazifa bo'lib qolmoqda. Jamoa ayni paytda «Brayton»dan besh ochko oldinda va zaxira o'yiniga ega. Tarkibdagi yo'qotishlarga qaramay, Slot shogirdlari mavsum yakunini muvaffaqiyatli yakunlashga harakat qiladi.
“Zamin”ni Telegramʻda oʻqing!
