Madridning “Real” klubida yana katta o‘zgarishlar bo‘lishi mumkin. Ispaniya matbuoti tarqatgan ma’lumotlarga ko‘ra, “qirollik klubi” prezidenti Florentino Peres portugaliyalik mashhur murabbiy Joze Mourino bilan maxsus uchrashuv o‘tkazgan.
Mundo Deportivo nashri xabariga ko‘ra, muzokara videokonferensiya shaklida bo‘lib o‘tgan va taxminan bir soat davom etgan. Suhbatda Joze Mourinoning agenti ham qatnashgan, ammo u faqat kuzatuvchi sifatida ishtirok etgani aytilmoqda.
Manba ma’lumotiga ko‘ra, uchrashuvda asosiy mavzulardan biri — portugaliyalik mutaxassisning “Real”ga ehtimoliy qaytishi bo‘lgan. Qayd etilishicha, Mourino Madrid klubiga qaytish ehtimolini rad etmagan, biroq hozircha aniq rozilik ham bermagan.
Xabarlarda aytilishicha, Joze Mourino rahbariyat oldiga bir qator shartlarni qo‘ygan. E’tiborlisi, bu talablar moliyaviy jihatlar bilan bog‘liq emas. Portugaliyalik murabbiy jamoaning sport tizimi, tibbiy shtab, tashkiliy ishlar va intizom masalalari bo‘yicha o‘z qarashlarini bildirgan.
Florentino Peres esa ushbu shartlar yuzasidan kelasi haftada yakuniy javob berishi mumkinligi aytilmoqda.
Joze Mourino “Real” tarixida o‘ziga xos iz qoldirgan murabbiylardan biri hisoblanadi. U 2010 yildan 2013 yilgacha Madrid klubini boshqargan va o‘sha davrda jamoa bilan Ispaniya chempionligi, mamlakat kubogi hamda Superkubogini qo‘lga kiritgan.
Ayniqsa, uning “Barselona”ga qarshi prinsipial bahslardagi kurashchan uslubi va jamoaga olib kirgan g‘alaba ruhi muxlislar tomonidan haligacha iliq eslab kelinadi.
Futbol tahlilchilari fikricha, agar Mourino yana “Real”ga qaytsa, bu Yevropa futbolidagi eng shov-shuvli voqealardan biriga aylanishi mumkin. Chunki portugaliyalik mutaxassis har doim kuchli xarakter, qat’iy intizom va katta bosim ostida natija qilish qobiliyati bilan ajralib turgan.
Ayni paytda madridlik muxlislar ushbu xabarlarni katta qiziqish bilan kuzatmoqda. Ko‘pchilik Joze Mourinoning ehtimoliy qaytishi klubda yangi davr boshlanishiga sabab bo‘lishi mumkinligini ta’kidlamoqda.
“Zamin”ni Telegramʻda oʻqing!
