Saudiya Pro-ligasining 33-turida muxlislar yana bir yorqin va gollarga boy bahs guvohiga aylanishdi. Peshqadamlardan biri bo‘lgan “An Nasr” safarda “Ash Shabob” mehmoni bo‘lib, tomoshabop uchrashuvda 4:2 hisobida g‘alaba qozondi.
Bellashuvning haqiqiy qahramoni Joau Feliks bo‘ldi. Portugaliyalik hujumchi maydonda fantastik o‘yin namoyish etib, xet-trikka erishdi va jamoasining asosiy g‘alaba me’moriga aylandi.
Uchrashuv juda tezkor boshlandi. Feliks 3-daqiqadayoq hisobni ochib, “An Nasr”ni oldinga olib chiqdi. Oradan ko‘p o‘tmay, u yana bir bor raqib darvozasini ishg‘ol qilib, hisobni 2:0 ko‘rinishiga keltirdi.
Biroq mezbonlar taslim bo‘lishni istashmadi. “Ash Shabob” futbolchilari Karrasko orqali hisobni qisqartirishga muvaffaq bo‘ldi va bahs yana qiziq tus oldi.
Ikkinchi bo‘limda esa sahnaga futbol afsonasi Krishtianu Ronaldu chiqdi. Portugaliyalik superyulduz 75-daqiqada o‘zining navbatdagi golini urib, professional faoliyatidagi gollari sonini 971 taga yetkazdi.
Bu gol nafaqat “An Nasr” uchun muhim bo‘ldi, balki Ronalduning futbol tarixidagi fenomenal statistikasini yanada boyitdi.
Keyinchalik “Ash Shabob” yana bir gol urib intrigani saqlab qolishga urindi. Ammo o‘yinga nuqtani aynan Joau Feliks qo‘ydi. U qo‘shimcha daqiqalarda o‘zining uchinchi golini urib, xet-trikni rasmiylashtirdi.
Saudiya Proligasi. 33-tur
Ash Shabob – An Nasr 2:4
Gollar: Karrasko 30, Al Bulayhi 80 – Feliks 3, 10, 90+8, Ronaldu 75
An Nasr – Bento, Culton (Al Nosir, 87), Ayman, Amri, Martines, Brozovich, G‘arib (Bushal, 71), Mane, Haybari, Feliks, Ronaldu (Al Hamdan, 90+1).
Shu tariqa, “An Nasr” muhim uch ochkoni qo‘lga kiritib, chempionlik poygasidagi yetakchiligini yanada mustahkamladi. Jamoa hisobida hozir 82 ochko mavjud.
“Ash Shabob” esa 32 ochko bilan turnir jadvalining 13-pog‘onasida qolmoqda.
Mutaxassislar fikricha, mavsumning hal qiluvchi qismida “An Nasr” hujum chizig‘i juda xavfli ko‘rinmoqda. Ayniqsa, Ronaldu va Feliksning birgalikdagi o‘yini raqiblar uchun katta muammo tug‘dirmoqda.
Muxlislar esa hozir bir savolni muhokama qilmoqda: Krishtianu Ronaldu faoliyati davomida 1000 ta gollik tarixiy marraga yeta oladimi?
“Zamin”ni Telegramʻda oʻqing!
