O‘zbekistonning birinchi raqamli shaxmatchisi Nodirbek Abdusattorov Shvetsiyaning Malmyo shahrida bo‘lib o‘tgan nufuzli TePeSigeman shaxmat turnirida 3-o‘rinni qo‘lga kiritdi. Dunyo shaxmati yulduzlari ishtirok etgan ushbu musobaqa hamyurtimiz uchun navbatdagi muhim tajriba, jiddiy sinov va kelgusi katta maqsadlar oldidan o‘ziga xos saboq maydoni bo‘ldi.
Nodirbek turnirni g‘alaba bilan boshladi. Bu start muxlislarda katta umid uyg‘otdi. Ammo keyingi oltita partiyada u raqiblari bilan durang natijalar qayd etdi. Shu tariqa, o‘zbekistonlik grossmeyster musobaqani mag‘lubiyatsiz yakunladi, biroq o‘zi kutgan yuqori natijaga erisha olmadi.
Abdusattorov musobaqadan keyin ijtimoiy tarmoqdagi sahifasi orqali o‘z fikrlarini bildirib, natijadan to‘liq qoniqmaganini ochiq aytdi. Uning so‘zlarida sportchiga xos xolislik, o‘z ustida ishlashga tayyorlik va kelajakda yanada kuchliroq qaytish istagi sezilib turibdi.
“Malmyodagi TePeSigeman shaxmat turnirida 3-o‘rinni egalladim. Men istagan natija bo‘lmadi, ammo oldinga harakat qilishda va xatolardan saboq olishda davom etamiz”, — dedi Abdusattorov.
Nodirbek, shuningdek, musobaqada g‘oliblikni qo‘lga kiritgan shaxmat olamining buyuk vakiliga ham hurmat bildirdi. U “GOAT'ga tabriklar! U yana bir bor klassik formatdagi kuchini isbotladi”, deya raqibining mahoratini e’tirof etdi. Bu so‘zlar Abdusattorovning nafaqat kuchli shaxmatchi, balki raqibni qadrlaydigan sportchi ekanini ham ko‘rsatadi.
Eng qizig‘i, Nodirbek o‘z fikrini “Men esa mehnat qilishda davom etaman. Bu — bo‘ron oldidangi sokinlik”, degan jumlalar bilan yakunladi. Bu gap muxlislar uchun oddiy izoh emas, balki katta qaytishga ishora bo‘ldi. Shaxmatda ba’zan bir turnirdagi natija yakuniy baho emas, balki keyingi yurishlar uchun tayyorgarlik bo‘ladi.
Abdusattorov uchun ushbu musobaqadagi 3-o‘rin, bir qarashda, kamtarona natijadek ko‘rinishi mumkin. Ammo u turnirni mag‘lubiyatsiz yakunladi, kuchli raqiblarga qarshi barqaror o‘yin ko‘rsatdi va o‘z xatolarini tahlil qilishga tayyorligini bildirdi. Bu esa professional sportchi uchun juda muhim jihat.
O‘zbekistonlik shaxmat muxlislari Nodirbekdan doim yuqori natijalar kutadi. Bu tabiiy. Chunki u allaqachon xalqaro maydonda o‘z nomini ayttirgan, eng kuchli grossmeysterlar bilan tengma-teng kurasha olishini isbotlagan sportchi. Shu sabab har bir turniri katta e’tibor bilan kuzatiladi.
Endi asosiysi — xulosa chiqarish, kuch to‘plash va keyingi musobaqalarda yanada dadilroq harakat qilish. Nodirbekning “bo‘ron oldidangi sokinlik” degan gapi esa muxlislarga aniq signal berdi: u to‘xtamaydi, taslim bo‘lmaydi va yana katta g‘alabalar uchun kurashadi.
“Zamin”ni Telegramʻda oʻqing!
