“Real Madrid” bosh murabbiyi Alvaro Arbeloa jamoa ichidagi ma’lumotlarning ommaviy axborot vositalariga chiqib ketishi borasida keskin munosabat bildirdi. Ispaniyalik mutaxassisning fikricha, kiyinish xonasidagi ichki gap-so‘zlar, mojarolar yoki jamoa muhitiga oid ma’lumotlarning matbuotga tarqalishi klubga nisbatan xiyonatdek qabul qilinadi.
Arbeloa matbuot anjumanida bu holat uni qattiq ranjitayotganini ochiq aytdi. Uning ta’kidlashicha, “Real Madrid” kabi ulkan klubda ichki muhit, futbolchilar o‘rtasidagi munosabat va kiyinish xonasidagi gaplar jamoaning o‘zida qolishi kerak.
— Kiyinish xonasidan ma’lumotlarning sizib chiqishi men uchun “Real Madrid”ga nisbatan xiyonatdek tuyuladi. Bu meni juda xafa qiladi. Kim buni qiladi? Bilmayman. Shuningdek, hech bir futbolchini ayblamayman, — dedi Arbeloa.
Murabbiyning bu gaplari “Real” atrofida so‘nggi kunlarda kuchaygan turli xabarlar fonida yangradi. Avvalroq jamoa yarim himoyachilari Federiko Valverde va Orelen Tchuameni o‘rtasida kiyinish xonasida janjal yuz bergani haqida ma’lumot tarqalgan edi. Ushbu voqea qisqa vaqt ichida xorijiy ommaviy axborot vositalarida keng muhokama qilindi.
Bunday vaziyat har qanday klub uchun noqulay, ammo “Real Madrid” kabi dunyo futbolida alohida maqomga ega jamoa uchun bu yanada og‘ir qabul qilinadi. Chunki madridliklardan doim nafaqat maydondagi natija, balki ichki intizom, professionallik va klub obro‘siga munosib munosabat ham talab qilinadi.
Arbeloa hech bir futbolchini ayblamayotganini aytgan bo‘lsa-da, uning so‘zlaridan klub ichida bu masala jiddiy ko‘rilayotgani seziladi. Kiyinish xonasi — jamoaning eng yopiq va ishonchli hududi hisoblanadi. U yerdagi gaplar tashqariga chiqsa, bu nafaqat futbolchilar o‘rtasidagi ishonchga, balki murabbiylar shtabi va rahbariyat munosabatiga ham ta’sir qilishi mumkin.
Hozirgi vaziyat “Real” uchun sport tomondan ham oson kechmayapti. Ispaniya chempionatining 34-turidan so‘ng madridliklar 77 ochko bilan turnir jadvalida ikkinchi o‘rinda bormoqda. Jamoa yetakchi “Barselona”dan 11 ochko ortda qolgan. Bu esa mavsumning hal qiluvchi qismida bosim yanada kuchayganini anglatadi.
“Real” uchun endilikda faqat maydonda natija ko‘rsatish emas, balki jamoa ichidagi muhitni ham barqarorlashtirish muhim vazifaga aylanmoqda. Chunki katta g‘alabalar ichki birdamlik, o‘zaro ishonch va tartib bo‘lmasa, juda qiyin qo‘lga kiritiladi.
Arbeloaning bayonoti esa futbolchilar va klub atrofidagi barchaga aniq signal bo‘ldi: “Real Madrid”da ichki ma’lumotlarni tashqariga chiqarish oddiy holat sifatida qabul qilinmaydi. Bu yerda sir ham, mas’uliyat ham katta. Klub nomi og‘ir — uni ko‘tarish uchun faqat yaxshi o‘ynash emas, jim turishni ham bilish kerak.
“Zamin”ni Telegramʻda oʻqing!
