Joe Cole Chelsi rahbariyatiga Robert Lewandowski va John Stonesni sotib olishni maslahat berdi
Chelsi klubi afsonasi Joe Cole jamoa rahbariyatini yosh futbolchilarga haddan tashqari eʼtibor qaratish siyosatidan voz kechib, tajribali oʻyinchilarni jalb qilishga chaqirdi. Uning fikricha, hozirgi tarkibda yoshlarga yoʻl-yoʻriq koʻrsatadigan yetakchilar yetishmayapti, bu esa maydondagi natijalarga salbiy taʼsir qilmoqda. Bu haqda Goal.com xabar beradi.
Cole Roman Abramovich davridagi Chelsi dunyoning eng kuchli futbolchilarini yigʻish orqali sovrinlar uchun kurashganini eslatib oʻtdi. Hozirgi kunda esa klub transfer siyosatida aniq yoʻnalishga ega emas va yosh iqtidorlar tajribali ustozlarsiz oʻz salohiyatini toʻliq namoyon eta olmayapti.
Sobiq futbolchi jamoani kuchaytirish uchun Manchester Siti himoyachisi John Stones va Barselona hujumchisi Robert Lewandowskini taklif qildi. Uning taʼkidlashicha, aynan shunday tajribali ijrochilar Chelsi himoyasini tartibga solishi va yosh hujumchilarga ustozlik qilishi mumkin.
Cole hozirgi Chelsi tarkibini "yaxshi oʻqituvchisi boʻlmagan iqtidorli oʻquvchilar guruhi"ga oʻxshatdi. Uning soʻzlariga koʻra, jamoaga darhol natija bera oladigan va maydonda yetakchilik qila oladigan futbolchilar suv va havodek zarur.
“Zamin”ni Telegramʻda oʻqing!
