Saudiya Arabistonida o‘tayotgan o‘smirlar o‘rtasidagi Osiyo chempionatida D guruhidan keyingi bosqichga yo‘l olgan jamoalar nomi ma’lum bo‘ldi. O‘zbekiston U-17 terma jamoasi Hindistonga qarshi bahsda ishonchli 3:0 hisobida g‘alaba qozonib, pley-off yo‘llanmasini naqd qildi.
Ushbu guruhda avval KXDR ham ishtirok etishi kerak edi. Biroq mazkur jamoa musobaqada qatnashmasligini ma’lum qilgach, D guruhida O‘zbekiston, Avstraliya va Hindiston termalari qoldi. 1-turda Avstraliya Hindiston darvozasiga javobsiz 4 ta gol urgandi. Bugun esa amaldagi chempion O‘zbekiston ham hindistonliklardan ustun kelib, raqib darvozasini uch bor ishg‘ol qildi.
Uchrashuvning 32-daqiqasida Laziz Abduraimov penaltidan aniq zarba berib, hisobni ochdi. Bu gol yosh futbolchilarimizga qo‘shimcha ishonch berdi va o‘yin nazoratini o‘z qo‘lida ushlab turish imkonini yaratdi.
Ikkinchi bo‘limda ham O‘zbekiston termasi bosimni susaytirmadi. 60-daqiqada Hindiston futbolchisi Singh o‘z darvozasini ishg‘ol qilib qo‘ydi va hisob 2:0 ko‘rinishiga keldi. 78-daqiqada esa Ahror Ravshanbekov uchinchi golni kiritib, bahs taqdirini uzil-kesil hal qildi.
Shu tariqa, O‘zbekiston va Avstraliya D guruhidan pley-offga chiqishni ta’minladi. Eng muhimi, har ikki jamoa Qatarda bo‘lib o‘tadigan kichik mundialga ham yo‘llanma oldi. Bu yosh futbolchilarimiz uchun juda katta natija va kelajak sari muhim qadam hisoblanadi.
Endi 13 may kuni bo‘lib o‘tadigan 3-turda O‘zbekiston va Avstraliya o‘zaro to‘qnash keladi. Ushbu bahs guruh g‘olibini aniqlab beradi. O‘zbekiston birinchi o‘rin bilan keyingi bosqichga chiqishi uchun Avstraliyani mag‘lub etishi kerak bo‘ladi.
Osiyo kubogi U-17
D guruhi. 2-tur
Hindiston — O‘zbekiston 0:3
Gollar: Laziz Abduraimov, 32, penalti, Singh, 60, avtogol, Ahror Ravshanbekov, 78.
O‘zbekiston U-17: Olim Shomurodov, Muhammadodil Orifxonov, Ahror Ravshanbekov, Mirjamol Anvarov, Muhammad Hakimov, Abubakr Rahimov, Islom Ravshanov, Adis Abdunabiyev, Muhammadjon Mamatov, Mirkomil Murodov, Suhrob Sadirjanov, Jahongirmirzo O‘ktamboyev, Laziz Abduraimov, Rustam Aliyev, Amirxon Erkinov, Farrux Hayitmurodov.
O‘zbekiston U-17 terma jamoasi bu o‘yinda o‘z vazifasini to‘liq bajardi. Himoyada ishonchli, hujumda samarali va muhim pallalarda sovuqqon harakat qilindi. Endi navbat Avstraliyaga qarshi hal qiluvchi bahsga. Pley-off bor, mundial yo‘llanmasi bor, endi guruhda birinchi o‘rinni ham olish kerak.
“Zamin”ni Telegramʻda oʻqing!
