Arsenal bosh murabbiyi Mikel Arteta Chempionlar ligasi finali oldidan muxlislar kutgan xabarni eʻlon qildi. Jamoa himoyachisi Jurrien Timber jarohatidan toʻliq forigʻ boʻlib, Pari Sen-Jermen (PSJ) klubiga qarshi Budapeshtda boʻlib oʻtadigan tarixiy bahsda maydonga tushishga tayyor. Bu haqda Goal.com xabar beradi.
Niderlandiyalik himoyachi mart oyi oʻrtalaridan beri maydonga tushmagan edi va aprel oyidagi asoratlar uning finalda ishtirok etishini soʻroq ostida qoldirgandi. Biroq, u oʻz vaqtida tiklanishga ulgurdi. Bu qaytish Ben White jarohat sabab safdan chiqqan bir paytda Arsenal uchun juda muhim hisoblanadi. Timber oʻng qanot himoyasida PSJning xavfli hujumlariga qarshi asosiy toʻsiq boʻlishi kutilmoqda.
Matbuot anjumanida Mikel Arteta futbolchining holati haqida gapirar ekan, uning asosiy tarkibda tushishga tayyorligini tasdiqladi. "Timber sogʻlom va u oʻyinni boshlashga tayyor", — dedi murabbiy. Shuningdek, Arteta bunday nufuzli bahs uchun tarkib tanlash qiyinligini, chunki barcha futbolchilar ushbu muhim lahzaning bir qismi boʻlishni istayotganini taʻkidladi.
Arsenal 22 yillik tanaffusdan soʻng Angliya Premer-ligasi chempionligini qoʻlga kiritib, Budapeshtga yoʻl olmoqda. Arteta ushbu muvaffaqiyat jamoaga qoʻshimcha ishonch bagʻishlaganini va endi ular "oltin dubl" qayd etib, klub tarixida yangi sahifa ochishga intilayotganini bildirdi.
“Zamin”ni Telegramʻda oʻqing!
