Pavel Durov Telegram’ga 10 ta yangi funktsiya qoʻshilishini e'lon qildi

^{Foto: Getty Images}
Telegram asoschisi Pavel Durov tez orada messenjerda 10 ta yangi funktsiya paydo boʻlishini e'lon qildi.

“Telegram jamoasini yaxshi koʻraman. Kechagina ilovamizga 10 ta takomillashtirilgan oʻzgarish kiritish taklifini kiritgandim. Shu kunning oʻzidayoq eskizlar tayyor boʻldi, bugun qoʻlimizda ushbu yangi funktsiyalarni oʻzida jamlagan tayyor versiyalar mavjud”, — deb yozdi u Telegram kanalida.

Durovning aniqlik kiritishicha, endilikda xabar yuborilgandan soʻng unga multimedia fayllari — foto va video qoʻshish imkoniyati boʻladi. Bungacha faqat yuborilgan mediafaylni boshqasiga almashtirish mumkin edi, ammo yangisini qoʻshish imkoni boʻlmagan. Ikkinchi asosiy oʻzgarishga koʻra, tahrirlangan xabarlarning tahrir vaqtini koʻrish mumkin boʻladi.

Qolgan beshta yangilanish messenjerdagi sovgʻalarga, uchtasi heshteglarga taalluqli ekani aytildi.

Oʻtgan hafta messenjer foydalanuvchilari bir-biriga “sovgʻalar” — xabarga qoʻshish mumkin boʻlgan animatsiyali tasvirlarni yuborish imkoniyatiga ega boʻlgandi. Sovgʻani qabul qilgan shaxs uni oʻz profiliga qoʻshishi yoki sovgʻa qiymatining bir qismini “yulduzchalar”ga almashtirishi mumkin. Durovning aytishicha, keyinchalik bularni tokenlarga (NFT) aylantirish imkoniyati yaratiladi.

Platformada kontent boʻyicha shikoyat qilish uchun yangi toifalar ham joriy etilgan (masalan, “noqonuniy tovarlar”, “shaxsiy ma'lumotlar”, “mualliflik huquqi”, “firibgarlik yoki spam” kabilar). Shuningdek, iOS tizimida video suhbatlar interfeysi yangilandi.

Sentyabr oyida Durov noqonuniy kontent ustidan shikoyat qilish uchun @SearchReport botini ishga tushirganini e'lon qilgandi. Telegram, shuningdek, “Yaqin atrofdagi odamlar” funktsiyasini olib tashlab, oʻrniga “Yaqin atrofdagi bizneslar”ni qoʻshishga qaror qildi, unda “qonuniy, tekshirilgan kompaniyalar” koʻrsatiladi. “Zamin” yangiliklarini “Telegram”da kuzatib boring