12 yadroli Core 9 o'yinlarda i9-14900K protsessorini ortda qoldirdi

Intel Core 9 273PQE protsessori o'yinlarda Core i9-14900K modelidan 10 foizgacha tezroq ishladi. Bu haqda Ixbt.com xabar beradi.

Bartlett Lake-S oilasiga mansub yangi qurilma nemis sharhlovchisi Zed Up tomonidan sinovdan o'tkazildi. Core 9 273PQE modeli 12 ta P-yadro, 24 ta oqim, 36 MB kesh va 5,9 GGs gacha chastotaga ega.

Protsessor DDR5-5600 va ECC xotirasini qo'llab-quvvatlaydi, quvvat sarfi esa 125 Vt ni tashkil etadi. Raptor Lake liniyasidan farqli o'laroq, bu yerda faqat yuqori unumdor P-yadrolar ishlatiladi.

Bartlett Lake-S protsessorlari o'rnatilgan tizimlarga mo'ljallangan bo'lsa-da, ular oddiy shaxsiy kompyuterlar bilan ham mos keladi. BIOS modifikatsiyasi orqali ularni oddiy CPU kabi ishlatish mumkin.

Sinov muallifining so'zlariga ko'ra, aynan katta yadrolarning mavjudligi Core 9 273PQE modeliga ustunlik bergan. Oltita o'yindan to'rttasida ushbu protsessor yetakchilik qildi.

«Rainbow Six Siege» o'yinida kadrlar chastotasida farq kuzatilmadi. «Counter-Strike 2» o'yinida esa Core i9-14900K atigi 1,5 foizlik farq bilan oldinga chiqdi.