Apple kompaniyasi iPhone 17 standart modelining ishlab chiqarish siklini sezilarli darajada uzaytirdi. Ishlab chiqarish quvvatlarining kengaytirilishi ushbu modelning 11-noyabr kungi yirik savdolarda ham faol ishtirok etishini ta'minlaydi. Ushbu qaror kompaniyaning joriy yildagi strategik o'zgarishlari bilan bevosita bog'liq. Bu haqda Ixbt.com xabar beradi.
Ma'lumotlarga ko'ra, Apple an'anaviy yillik taqdimot jadvaliga o'zgartirish kiritmoqda. Sentyabr oyida bo'lib o'tadigan kuzgi tadbirda faqat iPhone 18 Pro, iPhone 18 Pro Max hamda uzoq kutilgan buklanuvchi iPhone Ultra modellari namoyish etilishi kutilmoqda. Standart iPhone 18 modelini chiqarish esa kelgusi yilning bahoriga qadar kechiktiriladi.
Bu o'zgarish iPhone 17 modelini so'nggi yillardagi eng uzoq vaqt davomida dolzarb bo'lib qoladigan iPhone'ga aylantiradi. O'tgan yilning sentyabr oyida taqdim etilganidan buyon mazkur smartfon sotuvlar bo'yicha yetakchilikni saqlab qolmoqda va iPhone 18'ning kechikishi uning bozordagi mavqeini yanada mustahkamlaydi.
Eslatib o'tamiz, iPhone 17 2026-yilning birinchi choragida dunyodagi eng ko'p sotilgan smartfon deb topilgan bo'lib, umumiy bozor ulushining 6 foizini tashkil etgan edi. Hozirgi kunda ushbu turkumdagi qurilmalar Apple tarixidagi eng ommabop smartfonlar hisoblanadi.
“Zamin”ni Telegramʻda oʻqing!
