Rossiyada maʼlumotlar markazlari (data-center) uchun infratuzilmani barpo etish jarayonini osonlashtirish rejalashtirilmoqda. Yangi qoidalarga koʻra, yer uchastkasi egalaridan qurilish uchun ruxsat olish talabi bekor qilinishi mumkin. Bu haqda Ixbt.com xabar beradi.
Hozirgi kunda maʼlumotlar markazlarini ishga tushirishda eng katta toʻsiq — bu elektr tarmoqlari va aloqa kanallarini oʻtkazishdagi qiyinchiliklardir. Yer egalari va muhandislik inshootlari egalari koʻpincha kabel liniyalarini yotqizishga ruxsat bermay, loyihalarni toʻxtatib qoʻymoqda.
Hukumat qoshidagi tahliliy markaz maʼlumotlariga koʻra, amaldagi qonunchilik barcha yer egalarining roziligini olishni talab qiladi. Bu esa jarayonni sezilarli darajada sekinlashtiradi. Muammoni hal qilish uchun Fuqarolik kodeksiga oʻzgartirishlar kiritish taklif etilmoqda.
Xususan, gorizontal yoʻnaltirilgan burgʻulash kabi texnologiyalardan foydalanilganda, yer yuzasiga zarar yetkazilmaydi. Bunday hollarda yer egalaridan ruxsat olish oʻrniga, ularni shunchaki xabardor qilish kifoya qiladi.
Ushbu oʻzgarishlar infratuzilma rivojlanishini tezlashtirish va sohadagi maʼmuriy toʻsiqlarni kamaytirishga xizmat qiladi. Bu esa Rossiyada raqamli texnologiyalar va server quvvatlarini kengaytirish uchun yangi imkoniyatlar yaratadi.
“Zamin”ni Telegramʻda oʻqing!
