Rossiya temir yoʻllari (RJD) Moskva va Sankt-Peterburg shaharlaridagi yirik vokzallarda avtonom tozalovchi robotlardan foydalanishni boshladi. Bu haqda kompaniyaning rasmiy Telegram-kanalida maʼlum qilindi. Bu haqda Ixbt.com xabar beradi.
Robotlar Moskvadagi Qozon, Yaroslavl, Kursk, Pavelet va Kiyev vokzallari, shuningdek, Sankt-Peterburgdagi Moskva vokzalining ichki hududlarini tozalash ishlarini bajaradi. Qurilmalar polni supurish, yuvish, qotib qolgan kirlarni tozalash, xona xaritasini tuzish va optimal yoʻnalishni belgilash imkoniyatiga ega.
Aqlli tizimlar toʻsiqlarni mustaqil ravishda chetlab oʻtadi va quvvati tugaganda avtomatik ravishda quvvatlash stansiyasiga qaytadi. RJD maʼlumotlariga koʻra, robotlarning unumdorligi soatiga 1980 kvadrat metrni tashkil etadi, bu sakkizta basketbol maydoni yoki oʻntaga yaqin tennis korti maydoniga teng.
Ushbu texnologiyaning joriy etilishi suv, elektr energiyasi va yuvish vositalarini sezilarli darajada tejash imkonini beradi. 2026-yilning iyun oyidan boshlab vokzallarda bugʻ generatorlari yordamida sanitariya ishlovini yanada kuchaytirish rejalashtirilgan.
“Zamin”ni Telegramʻda oʻqing!
