Apple kompaniyasi iPhone 16 taqdimotidan oldin sun’iy intellekt funksiyalarini noto‘g‘ri reklama qilganlikda ayblanib ochilgan sud ishini yopish uchun 250 million dollar to‘lashga rozi bo‘ldi. Financial Times xabariga ko‘ra, da’vogarlar Apple kompaniyasini Apple Intelligence imkoniyatlarini, xususan, Siri yordamchisining yangilangan versiyasini bo‘rttirib ko‘rsatganlikda ayblashgan. Bu haqda Techcrunch.com xabar beradi.
Sudga kiritilgan shikoyatda aytilishicha, kompaniya foydalanuvchilarda ilg‘or sun’iy intellekt imkoniyatlari kutilganidan tezroq paydo bo‘lishi haqida noto‘g‘ri taassurot qoldirgan. Natijada, iPhone 15 yoki iPhone 16 xarid qilgan mijozlar sotib olish vaqtida mavjud bo‘lmagan texnologiyalar uchun pul to‘laganliklarini da’vo qilishgan.
Apple sud jarayonida aybini tan olmadi, biroq sudni davom ettirmaslik uchun kelishuvga erishishni ma’qul ko‘rdi. Kelishuv shartlariga ko‘ra, 2024-yil 10-iyundan 2025-yil 29-martgacha iPhone 15 yoki iPhone 16 sotib olgan AQShlik mijozlar har bir qurilma uchun 95 dollargacha tovon puli olishlari mumkin.
Apple 2024-yilda WWDC konferensiyasida Apple Intelligence tizimini taqdim etganidan beri Siri’ning yanada aqlliroq versiyasini va’da qilib kelmoqda. Ushbu yangilanishlar Siri’ni ChatGPT yoki Claude kabi zamonaviy chatbotlar darajasiga olib chiqishi kutilmoqda.
Yangi tizim Google Gemini texnologiyasi bilan ishlashi mumkinligi haqida mish-mishlar mavjud, biroq so‘nggi xabarlarga ko‘ra, Apple foydalanuvchilarga turli xil uchinchi tomon yirik til modellarini tanlash imkonini berishi mumkin. Ushbu kelishuv Apple kompaniyasining 8-iyun kuni bo‘lib o‘tadigan yillik dasturchilar konferensiyasi arafasida amalga oshirildi.
“Zamin”ni Telegramʻda oʻqing!
