Smart Pikachu insayderi tomonidan tarqatilgan yangi maʼlumotlarga koʻra, Huawei Mate 90 Pro Max smartfoni 10 karrali optik zumga ega periskop kamera hamda qoʻshimcha teleobʼyektiv bilan taʼminlanishi kutilmoqda. Agar bu xabar tasdiqlansa, Huawei flagmanlari bozorda raqamli kadrni kesish (cropping) usulidan voz kechib, sof optik imkoniyatlarga qaytish tendensiyasini kuchaytiradi. Bu haqda Ixbt.com xabar beradi.
Eslatib oʻtamiz, avvalgi Mate 80 Pro Max modeli 4 karrali va 6,2 karrali optik zumga ega ikkita 50 megapikselli periskop tizimi bilan jihozlangan edi. Oppo Find X9 Ultra modelida namoyish etilgan 10 karrali zum tizimi 230 mm ekvivalent fokus masofasi va murakkab prizma tizimi orqali yuqori detallarni saqlab qolish imkonini beradi. Huawei ham oʻzining yangi flagmanida shunga oʻxshash texnologiyani qoʻllashni rejalashtirmoqda.
Yangi qurilma 1 dyuymli yirik asosiy sensor va Huawei XMAGE tasvirni qayta ishlash tizimi bilan uygʻunlashadi. Taxminlarga koʻra, Huawei Mate XT 2 va Mate 90 seriyasi sentyabr-oktyabr oylarida taqdim etiladi. Smart Pikachu avval ham Xiaomi 13 Ultra va Xiaomi Pad 6 kabi qurilmalar haqidagi aniq maʼlumotlari bilan tanilgan.
“Zamin”ni Telegramʻda oʻqing!
