Vivo kompaniyasining navbatdagi flagman smartfonlari taqdimoti yaqinlashmoqda. GSMA IMEI bazasida Vivo X500, Vivo X500 Pro va Vivo X500e modellari paydo bo‘ldi. Qizig‘i shundaki, ishlab chiqaruvchi X400 turkumini butunlay o‘tkazib yuborib, to‘g‘ridan-to‘g‘ri X500 seriyasiga o‘tishga qaror qilgan ko‘rinadi. Bu haqda Ixbt.com xabar beradi.
Dastlabki ma’lumotlarga ko‘ra, Vivo X500 6,37 dyuymli ekranga ega bo‘ladi. X500 Pro modeli esa 2K aniqligidagi va yuqori yangilanish tezligiga ega 6,83 dyuymli LTPO OLED-panel bilan jihozlanadi. Qurilmalarda ekran ostiga o‘rnatilgan ultratovushli barmoq izi skanerlari saqlanib qolishi kutilmoqda, biroq smartfonlarning o‘lchamlari o‘tgan yilgi X300 va X300 Pro modellariga nisbatan biroz kattalashadi.
Yangi turkumning texnik asosini TSMC 2-nanometrli texnologiyasi asosida yaratilgan MediaTek Dimensity 9600 protsessori tashkil etishi kutilmoqda. Smartfonlarning asosiy ustunligi yana kamera imkoniyatlari bo‘ladi.
Pro-versiyalar dinamik diapazonni yaxshilash uchun LOFIC texnologiyasiga ega sensorlar hamda 200 megapikselli periskop teleobyektiv bilan jihozlanishi taxmin qilinmoqda.
“Zamin”ni Telegramʻda oʻqing!
