Vivo X500 turkumidagi smartfonlar qatori kutilganidan ham kengroq bo‘lishi ma’lum bo‘ldi. IMEI ma’lumotlar bazasida Vivo X500 Pro Max modelining paydo bo‘lishi, ushbu liniyada Vivo X500e, X500 va X500 Pro modellaridan tashqari to‘rtinchi qurilma ham borligini tasdiqladi. Bu haqda Ixbt.com xabar beradi.
Taxminlarga ko‘ra, Vivo X500 Pro Max 2027-yilgacha, ya’ni Vivo X500 Ultra taqdim etilgunga qadar seriyadagi eng ilg‘or smartfon bo‘lib qoladi. Qurilma 6,9 dyuymli 2K AMOLED displey, yangi Dimensity 9600 protsessori hamda 100 Vt quvvatlash imkoniyatiga ega 7000 mA·soat sig‘imli akkumulyator bilan jihozlanishi kutilmoqda.
Qizig‘i shundaki, kompaniya X400 turkumini butunlay o‘tkazib yuborib, to‘g‘ridan-to‘g‘ri X500 seriyasiga o‘tishga qaror qilgan. Dastlabki ma’lumotlarga ko‘ra, bazaviy Vivo X500 6,37 dyuymli ekranga ega bo‘lsa, X500 Pro modeli 6,83 dyuymli 2K LTPO OLED-panel bilan ta’minlanadi.
Yangi smartfonlarda ekran osti ultratovushli barmoq izi skanerlari saqlanib qoladi, biroq qurilmalarning o‘lchamlari o‘tgan yilgi X300 va X300 Pro modellariga nisbatan biroz kattalashadi. Eslatib o‘tamiz, Vivo X300 Pro hozirda DxOMark reytingida eng yaxshi kamerali smartfonlar orasida ikkinchi o‘rinni egallab turibdi.
“Zamin”ni Telegramʻda oʻqing!
