Rossiyaning «Bilayn» aloqa operatori Moskva va Moskva viloyatidagi o‘z abonentlariga 9-may kuni mobil internet va SMS xizmatlarida uzilishlar bo‘lishi mumkinligi haqida ogohlantirish yubordi. Bu haqda Ixbt.com xabar beradi.
Operator xabariga ko‘ra, G‘alaba kuni munosabati bilan o‘tkaziladigan bayram tadbirlari xavfsizligini ta’minlash maqsadida mobil tarmoq faoliyatiga vaqtinchalik cheklovlar kiritiladi. Bu cheklovlar, jumladan, «oq ro‘yxatlar» (white lists) orqali kirish imkoniyatiga ham taalluqli bo‘ladi.
Avvalroq Rossiya Raqamli rivojlanish vazirligi 7–8-may kunlari Moskvada internetni o‘chirish rejalashtirilmaganini ma’lum qilgan edi. Biroq vazirlik xavfsizlikka tahdid tug‘ilganda tezkor va manzilli choralar ko‘rilishi mumkinligini istisno etmagan.
Mutaxassislarning qayd etishicha, 9-may kuni bayram tadbirlari davomida mobil aloqa va internet xizmatlarida uzilishlar kuzatilishi kutilmoqda. Foydalanuvchilarga ushbu vaqt oralig‘ida aloqa bilan bog‘liq muammolarga tayyor turish tavsiya etiladi.
“Zamin”ni Telegramʻda oʻqing!
