Oppo K15 smartfoni: 8000 mAs sig‘imli batareya va Snapdragon 6 Gen 5 protsessori

Oppo kompaniyasi o‘zining K15 turkumini kengaytirishda davom etmoqda. Oppo K15 Pro va K15 Pro+ modellaridan so‘ng, endilikda bazaviy Oppo K15 smartfoni haqidagi ma’lumotlar oshkor bo‘ldi. Taniqli insayder Panda is Bald yangi qurilmaning asosiy texnik xususiyatlarini ma’lum qildi. Bu haqda Ixbt.com xabar beradi.

Qurilma 6,78 dyuymli 1,5K aniqligidagi AMOLED displey bilan jihozlanadi. Smartfonning qalinligi 8,8 mm, og‘irligi esa 213 grammni tashkil etadi. Eng e’tiborli jihati shundaki, smartfon taxminan 8000 mAs sig‘imli ulkan akkumulyatorga ega bo‘ladi. TENAA ma’lumotlar bazasida ushbu model 7820 mAs nominal sig‘im bilan qayd etilgan.

Oppo K15 unumdorligi uchun yangi Snapdragon 6 Gen 5 protsessori javob beradi. Qualcomm kompaniyasi Oppo ushbu platformadan foydalanuvchi ilk brendlardan biri bo‘lishini tasdiqlagan edi. Protsessor 2,6 GGs chastotada ishlaydi.

Smartfon xotira borasida keng tanlovni taqdim etadi: 6, 8, 12 va 16 GB tezkor xotira (RAM) hamda 128 GB dan 1 TB gacha bo‘lgan ichki xotira variantlari mavjud bo‘ladi. Kamera tizimi 16 megapikselli old kamera hamda 50 va 8 megapikselli sensorlarga ega asosiy moduldan iborat.

Nodirbek Razzokov

«ZAMIN.UZ» muharriri

+ Zamin.uz saytini Google'ga qo'shing