9-may kuni soat 05:00 dan boshlab Moskvada bayram tadbirlari munosabati bilan mobil internet va SMS xizmatlariga vaqtinchalik cheklovlar joriy etildi. Rossiya Raqamli rivojlanish vazirligi avvalroq foydalanuvchilarni ushbu holat haqida ogohlantirgan edi. Uy sharoitidagi Wi-Fi tarmoqlari esa odatdagi tartibda ishlashda davom etmoqda. Bu haqda Ixbt.com xabar beradi.
Poytaxtning markaziy ko‘chalari, jumladan Tverskaya, Moxovaya, Bolshaya Nikitskaya, Petrovka, Oxotniy Ryad va Volxonka ko‘chalari, shuningdek, Kreml va Moskvoretskaya qirg‘oqlari transport harakati uchun yopildi. Ushbu hududlarda 8-maydan boshlab avtoturargohlardan foydalanish taqiqlangan.
Metropoliten faoliyatida ham o‘zgarishlar kuzatilmoqda. Markazdagi bir qator bekatlar, xususan, «Oxotniy Ryad», «Teatralnaya» va «Aleksandrovskiy sad» faqat kirish va o‘tish uchun ochiq bo‘ladi. Cheklovlar bayram tadbirlari yakunlangunga qadar amal qiladi.
Mobil aloqa va internet bilan bog‘liq uzilishlar nafaqat Moskvada, balki Yekaterinburg, Tyumen, Rostov va boshqa shaharlarda ham kuzatilayotgani haqida xabarlar kelib tushmoqda.
“Zamin”ni Telegramʻda oʻqing!
