Boston Consulting Group (BCG) tomonidan oʻtkazilgan yangi tadqiqot shuni koʻrsatadiki, korporatsiyalarda sunʼiy intellektni (AI) joriy etish jarayonida bosh direktorlar (CEO) va direktorlar kengashi oʻrtasida jiddiy qarashlar tafovuti yuzaga kelmoqda. Soʻrovda qatnashgan bosh direktorlarning 61 foizi direktorlar kengashi texnologik trenddan ortda qolish qoʻrquvi sababli AI yechimlarini oʻta shoshqaloqlik bilan tatbiq etayotganini taʼkidlashgan. Bu haqda Ixbt.com xabar beradi.
Tadqiqot shuni koʻrsatadiki, direktorlar kengashi aʼzolarining 75 foizi AI imkoniyatlarini toʻliq tushunishiga ishonsa-da, bosh direktorlarning 35 foizi bu borada skeptik qarashda. Koʻplab rahbarlar kengash aʼzolari AIning inson mehnatini almashtirish qobiliyatini haddan tashqari oshirib yuborayotganini va texnologiyaning biznes strategiyasiga taʼsirini real baholay olmayotganini qayd etishgan.
Qizigʻi shundaki, direktorlar kengashi aʼzolari oʻzlarining AI boʻyicha bilimlariga qanchalik kam ishonch bildirsalar, kompaniya texnologiyalarni yetarlicha tez joriy etmayapti, degan xulosaga shunchalik koʻproq moyil boʻlishadi. Mutaxassislar ushbu muammoni hal qilish uchun bosh direktorlar direktorlar kengashini AI vositalarining real imkoniyatlari bilan yaqindan tanishtirishi va ularni tizimli oʻqitish jarayoniga jalb qilishi kerakligini tavsiya etmoqda.
Bugungi kunda bosh direktorlar faoliyatini baholashning qariyb 35 foizi aynan AI loyihalaridan olinadigan investitsiya daromadlari (ROI) bilan bogʻliq. Shunga qaramay, respondentlarning 80 foizi kelajakdagi direktorlar kengashi aʼzolari sunʼiy intellektning sanoatdagi transformatsion kuchini chuqur tushunishi shart degan fikrga kelishgan.
“Zamin”ni Telegramʻda oʻqing!
