TechPowerUp sayti oʻz oʻquvchilari oʻrtasida NVIDIA DLSS 5 texnologiyasiga boʻlgan munosabat yuzasidan keng koʻlamli soʻrovnoma oʻtkazdi. Unda 20 mingga yaqin foydalanuvchi ishtirok etdi va natijalar geymerlarning sunʼiy intellektning oʻyin jarayoniga aralashuviga nisbatan salbiy munosabatda ekanligini koʻrsatdi. Bu haqda Ixbt.com xabar beradi.
Soʻrovnoma natijalariga koʻra, respondentlarning 58 foizi bunday texnologiyalarga qarshi ekanligini bildirgan. 28 foiz foydalanuvchi yakuniy qarorga kelish uchun texnologiyaning oʻyinlardagi real namoyishini kutish kerak deb hisoblaydi. Atigi 8 foiz ishtirokchi neyron renderlashni tabiiy tasvirdan ustun qoʻyadi, 6 foiz geymer esa DLSS 5 dan faqat unumdorlik sezilarli darajada oshgan taqdirdagina foydalanishga tayyor.
Mutaxassislarning fikricha, bu yerda nomlanish bilan bogʻliq tushunmovchilik yuzaga kelgan boʻlishi mumkin. Geymerlar DLSS ni odatda tasvir sifatini yaxshilovchi vosita (upscaler) sifatida qabul qilishadi, biroq NVIDIA DLSS 5 da asosiy eʼtiborni aynan neyron renderlashga qaratmoqda. Bu esa texnologiyaning oʻzi unumdorlikka salbiy taʼsir koʻrsatishi mumkinligidan xavotirlarni keltirib chiqarmoqda.
NVIDIA mazkur texnologiyani kuz faslida taqdim etishni vaʼda qilgan edi, biroq hozircha bu borada aniq tafsilotlar mavjud emas. Kompaniya anʼanaviy tasvirni yaxshilash funksiyalari saqlanib qolishini taʼkidlasa-da, foydalanuvchilarning ishonchini qozonish uchun hali koʻp ish qilinishi kerak.
“Zamin”ni Telegramʻda oʻqing!
