Blackstone maʼlumotlar markazi aholi suvsiz qolgan paytda 110 million litr suv ishlatdi

AQShning Jorjiya shtatida sunʼiy intellekt infratuzilmasi bilan bogʻliq yirik mojaro yuzaga keldi. Blackstone investitsiya gigantiga qarashli Quality Technology Services (QTS) kompaniyasi mahalliy aholi suv bosimi pasayishidan shikoyat qilayotgan bir paytda, suv quvurlariga noqonuniy ulanib, 110 million litr suvni sarflab yuborgani aniqlandi. Bu haqda Ixbt.com xabar beradi.

QTS Fayetteville loyihasi doirasida qurilayotgan ulkan majmua uchun suvdan ruxsatsiz foydalanilgan. Hududda qurgʻoqchilik sababli aholi suvni tejashga chaqirilgan boʻlsa-da, kompaniya qurilish ehtiyojlari, xususan, beton qorish va changni bostirish uchun kommunal tarmoqlardan nazoratsiz suv olgan. Mahalliy suv xizmati vakillari ushbu holatni texnik xatoliklar va kadrlar yetishmovchiligi bilan izohlagan.

Kompaniya ushbu suv uchun 147 ming dollar miqdorida toʻlovni amalga oshirishi kerak edi, biroq okrug rasmiylari QTS eng yirik mijoz ekanligini vaj qilib, jarima solishdan bosh tortdi. QTS kelajakda yopiq sovutish tizimlaridan foydalanishni vaʼda qilmoqda, biroq bu voqea sunʼiy intellekt texnologiyalarining resurslarga boʻlgan ochkoʻzligi borasida jiddiy savollarni oʻrtaga tashladi.

Hozirgi kunda Jorjiya shtatida 200 dan ortiq maʼlumotlar markazi mavjud boʻlib, ularning energiya va suv resurslariga boʻlgan talabi mahalliy aholi noroziligiga sabab boʻlmoqda. Koʻplab shaharlar yangi maʼlumotlar markazlari qurilishiga moratoriy joriy etgan. Ushbu hodisa texnologik taraqqiyot va tabiiy resurslar taqchilligi oʻrtasidagi ziddiyatning yaqqol namunasi boʻlib qoldi.