Elon Musk X ijtimoiy tarmogʻidagi foydalanuvchilardan birining Instagram platformasida shaxsiy xabarlar uchun yakuniy shifrlash (end-to-end encryption) funksiyasi bekor qilingani haqidagi postini ulashdi. Milliarder ushbu holatni tanqid qilib, foydalanuvchilarni yangi XChat xizmatiga oʻtishga chaqirdi. Bu haqda Ixbt.com xabar beradi.
XChat oʻz foydalanuvchilariga hech qanday «orqa eshiklar»siz, toʻliq yakuniy shifrlash tizimini taklif etadi. Mazkur messenjerda reklama mavjud emas va u foydalanuvchilarning shaxsiy maʼlumotlarini yigʻmaydi. Shuningdek, xizmat yuqori tezlik va X hisob qaydnomasi bilan chuqur integratsiyani taʼminlaydi.
Yangi platforma WhatsApp va Telegram kabi yirik messenjerlarga raqobatchi sifatida ishlab chiqilgan. XChat imkoniyatlari orasida video va ovozli qoʻngʻiroqlar, fayllar almashinuvi, skrinshotlardan himoya qilish hamda xabarlarni barcha ishtirokchilar uchun tahrirlash yoki oʻchirish funksiyalari mavjud.
Muskning fikricha, boshqa platformalar maxfiylikdan voz kechayotgan bir paytda, X xavfsiz muloqot kelajagini barpo etmoqda. XChat foydalanuvchilarga qulaylik va shaxsiy hayot daxlsizligi oʻrtasida tanlov qilish majburiyatini yuklamaydi.
“Zamin”ni Telegramʻda oʻqing!
