Xitoy texnologiyasi: 30 TB/s tezlikka ega yangi 3D xotira arxitekturasi

Xitoyning Tsinghua Unigroup kompaniyasi Purple String nomli innovatsion 3D Near-Memory Computing (PNM) arxitekturasini taqdim etdi. Ushbu texnologiya 3D DRAM asosida yaratilgan bo‘lib, ma’lumotlarni uzatish tezligini soniyasiga 30 terabaytgacha (TB/s) yetkazish imkonini beradi. Bu haqda Ixbt.com xabar beradi.

Taqqoslash uchun, hozirgi kunda AMD va NVIDIA tomonidan foydalanilayotgan HBM3e xotirasi 1,2 TB/s tezlikka ega, NVIDIA B200 grafik protsessori esa maksimal 8 TB/s ko‘rsatkichni qayd etadi. Yangi arxitektura nafaqat tezlik, balki kechikish vaqti (latency) bo‘yicha ham sezilarli ustunlikka ega.

Processing-Near-Memory rejimi ma’lumotlarga kirish vaqtini bir necha barobar qisqartiradi. Tsinghua Unigroup mutaxassislarining ta’kidlashicha, ushbu texnologiya allaqachon tayyor va ommaviy ishlab chiqarish bosqichiga o‘tishga qodir.

Loyihaning eng muhim jihati shundaki, u to‘liq Xitoyning ichki ta’minot zanjiriga asoslangan. Bu esa kompaniyani g‘arb texnologiyalariga bo‘lgan qaramlikdan xalos etib, mustaqil rivojlanish imkonini beradi.