Shimoliy Amerika elektr ta’minoti ishonchliligi korporatsiyasi (NERC) ma’lumotlar markazlarining nazoratsiz o‘sishi energetika tizimi barqarorligiga jiddiy xavf solayotganini tan oldi. Yangi ma’lumotlar markazlarining elektr energiyasiga bo‘lgan talabi yirik shaharlar ehtiyojidan ham oshib ketayotgani mutaxassislarni xavotirga solmoqda. Bu haqda Ixbt.com xabar beradi.
May oyi boshida NERC vaziyatni tartibga solish maqsadida yetti banddan iborat "zaruriy choralar" to‘plamini e’lon qildi. Ushbu hujjat ma’lumotlar markazlari egalaridan ma’lumot yig‘ish va sinov protokollarini yaratishni nazarda tutadi. Biroq, hozirgi kunda ushbu sektor huquqiy "kulrang zona"da qolmoqda va NERCning majburiy standartlari ularga tatbiq etilmaydi.
Texnik jihatdan, an’anaviy energiya tizimlari ma’lumotlar markazlarining soniyada o‘zgarib turadigan raqamli yuklamalariga moslashmagan. NERC hisobotlarida elektron jihozlar keltirib chiqargan tebranishlar tufayli generatorlarning ishdan chiqish holatlari qayd etilgan. Korporatsiya hozircha tavsiyalarni bajarmaganlik uchun jarima solish vakolatiga ega emas.
Mutaxassislarning fikricha, sun’iy intellekt va bulutli hisoblash texnologiyalarining jadal rivojlanishi energetika sektorini og‘ir ahvolga solib qo‘ymoqda. IT-gigantlar o‘z faoliyati tafsilotlarini energetika kompaniyalari bilan bo‘lishishni istamayapti, bu esa tarmoqlarni modernizatsiya qilish xarajatlarini oddiy iste’molchilar zimmasiga yuklash xavfini tug‘dirmoqda.
“Zamin”ni Telegramʻda oʻqing!
