Pensilvaniya, Ogayo va Gʻarbiy Virjiniya shtatlarida faoliyat yurituvchi Community Bank kiberxavfsizlik hodisasi yuz berganini maʼlum qildi. Bank mijozlarning ism-sharifi, tugʻilgan sanasi va ijtimoiy sugʻurta raqamlari uchinchi shaxslarga oshkor boʻlganini tan oldi. Bu haqda Techcrunch.com xabar beradi.
AQSh Qimmatli qogʻozlar va birjalar komissiyasiga taqdim etilgan 8-K shaklidagi hisobotga koʻra, maʼlumotlar sizib chiqishiga "ruxsat etilmagan sunʼiy intellekt dasturiy taʼminotidan foydalanish" sabab boʻlgan. Bank ushbu holatni maxfiy maʼlumotlarning hajmi va sezgirligi tufayli ochiqlashga qaror qildi.
Hodisa tafsilotlari toʻliq ochiqlanmagan boʻlsa-da, bank xodimlaridan biri mijozlar maʼlumotlarini onlayn AI chat-botiga yuklagan boʻlishi mumkinligi taxmin qilinmoqda. Bu esa maxfiy maʼlumotlarning chat-bot ishlab chiqaruvchisi serverlariga tushib qolishiga olib kelgan.
Community Bank qancha mijoz jabr koʻrgani yoki qaysi sunʼiy intellekt ilovasi ishlatilganini hozircha oshkor qilmadi. Bank rahbariyati zarar koʻrgan mijozlar maʼlumotlarini baholash jarayoni ketayotganini va qonunchilikka muvofiq tegishli xabarnomalar yuborilayotganini bildirdi.
“Zamin”ni Telegramʻda oʻqing!
