Sony kompaniyasi o‘zining taqiladigan iqlim nazorati qurilmasining yangi avlodini namoyish etdi. Reon Pocket Pro Plus deb nomlangan ushbu ixcham gadjet bo‘yinga taqiladi va tana haroratini samarali boshqarish imkonini beradi. 2019-yildan buyon Yaponiyada rivojlanib kelayotgan ushbu texnologiya endilikda Yevropa va AQSh bozorlariga ham kirib bormoqda. Bu haqda Ixbt.com xabar beradi.
Yangi modelning asosiy afzalligi sovutish samaradorligining avvalgi avlodga nisbatan 20 foizga oshganidir. Kompaniya ma’lumotlariga ko‘ra, sovutish plitasi harorati qo‘shimcha 2 darajagacha pasayishi mumkin, bu esa issiq havoda foydalanuvchiga yanada ko‘proq salqinlik hissini taqdim etadi. Shuningdek, qurilma konstruksiyasi ham qayta ishlab chiqilgan bo‘lib, unda moslashuvchan bo‘yin mahkamlagichi va issiq havoni kiyim ostida to‘planib qolishidan saqlovchi sozlanuvchan havo chiqarish kanali mavjud.
Qurilma ichida ikkita termomodul va teri haroratini o‘lchovchi sensorlar o‘rnatilgan. Foydalanuvchilar maxsus ilova orqali kerakli haroratni belgilashlari yoki aqlli rejimlardan foydalanishlari mumkin, ular atrof-muhit sharoitiga qarab avtomatik tarzda moslashadi. Shuningdek, qurilmani smartfonsiz, korpusdagi tugmalar yordamida ham boshqarish imkoniyati saqlab qolingan.
Reon Pocket Pro Plus batareyasi taxminan 15 soatlik uzluksiz ishlashga mo‘ljallangan. Tizimning aniqligini yanada oshirish uchun qo‘shimcha Reon Pocket Tag 2 sensori ham taqdim etilgan bo‘lib, u atrof-muhitdagi harorat va namlik darajasini doimiy ravishda kuzatib boradi.
“Zamin”ni Telegramʻda oʻqing!
