Mudofaa texnologiyalari sohasidagi yetakchi kompaniya Anduril navbatdagi yirik sarmoyaviy bosqichni yakunladi. Kompaniya Series H doirasida 5 milliard dollar mablagʻ jalb qildi, bu esa uning bozor qiymatini 61 milliard dollarga yetkazdi. Mazkur moliyaviy bosqichga Thrive Capital va Andreessen Horowitz investorlari yetakchilik qilishdi. Bu haqda Techcrunch.com xabar beradi.
Anduril bosh direktori Brian Schimpf oʻz blogida kompaniya daromadi 2025-yilda ikki barobarga oshib, 2,2 milliard dollarni tashkil etganini maʼlum qildi. Bu natija kompaniyaning bir yil avvalgi 30,5 milliard dollarlik bahosini ikki barobar oshirishga imkon berdi.
AQSh Mudofaa vazirligi mudofaa texnologiyalari bozorida raqobatni saqlab qolishga intilmoqda. Masalan, AQSh Harbiy-havo kuchlari Andurilning “Fury” nomli uchuvchisiz qiruvchi samolyoti uchun dasturiy taʼminotni tanlashda Shield AI kompaniyasi bilan hamkorlik qilishga qaror qildi. Bu esa hukumatning yagona yetkazib beruvchiga bogʻlanib qolmaslik strategiyasini anglatadi.
Anduril xalqaro miqyosda ham faoliyatini kengaytirmoqda. Kompaniya Niderlandiya Mudofaa vazirligi bilan shartnoma imzoladi hamda AQSh armiyasi uchun Lattice platformasi yordamida raketaga qarshi mudofaa tizimlarini tahlil qiluvchi dasturiy taʼminotni ishlab chiqmoqda.
Soʻnggi yillarda mudofaa texnologiyalari sohasiga venchur sarmoyalarning oqimi sezilarli darajada oshdi. Anduril bilan bir qatorda Shield AI, Hermeus va Helsing kabi kompaniyalar ham milliardlab dollarlik baholash koʻrsatkichlariga erishib, sohada yangi davrni boshlab berishdi.
“Zamin”ni Telegramʻda oʻqing!
