Janubiy Koreyada sunʼiy intellekt (AI) texnologiyalari rivoji ortidan kelayotgan qoʻshimcha soliq tushumlarini fuqarolarga «dividend» sifatida taqsimlash masalasi muhokama qilinmoqda. Ushbu tashabbus bilan prezidentning siyosiy shtab rahbari Kim Yon-bom chiqdi. Bu haqda Ixbt.com xabar beradi.
Kim Yon-bomning taʼkidlashicha, hukumat AI sohasidan katta foyda koʻrayotgan kompaniyalardan olinadigan qoʻshimcha soliqlar hisobiga aholini qoʻllab-quvvatlashi mumkin. U biznes uchun yangi soliqlar joriy etilmasligini, balki mavjud byudjet mablagʻlarini qayta taqsimlash nazarda tutilayotganini alohida qayd etdi.
Ushbu bayonot fond bozorida qisqa muddatli sarosimaga sabab boʻldi. Xususan, Samsung Electronics va SK Hynix aksiyalari 2–2,5 foizga arzonlashdi. Biroq, bu shaxsiy tashabbus ekani va hukumat darajasida rasmiy qaror qabul qilinmagani maʼlum boʻlgach, vaziyat barqarorlashdi.
Tahlilchilarning fikricha, AI infratuzilmasiga boʻlgan talab ortishi Samsung va SK Hynix kompaniyalariga rekord darajadagi foyda keltirishi kutilmoqda. Davlat esa ushbu mablagʻlarni taʼlim, yoshlar va tadbirkorlikni qoʻllab-quvvatlash hamda pensiya dasturlarini moliyalashtirish uchun maxsus jamgʻarmaga yoʻnaltirishni taklif qilmoqda.
Mazkur yondashuv AI iqtisodiyotiga yangicha qarashni anglatadi. Agar sunʼiy intellekt yirik korporatsiyalarga oʻta yuqori daromad keltirsa, jamiyat ham davlat dasturlari orqali ushbu muvaffaqiyatdan oʻz ulushini olishi kerak, degan gʻoya ilgari surilmoqda.
“Zamin”ni Telegramʻda oʻqing!
