Sunʼiy intellekt asosida ishlovchi ilovalarni yaratish platformasi Lovable Daniyaning Atech nomli apparat taʼminoti (hardware) startapiga sarmoya kiritdi. Ushbu kompaniya apparat vositalarini loyihalash jarayoniga “vibe coding” yondashuvini olib kirishni maqsad qilgan. Lovable 800 ming dollarlik pre-seed bosqichidagi moliyalashtirish raundida ishtirok etdi, unda shuningdek a16z, Sequoia Scout Fund va Nordic Makers kabi nufuzli jamgʻarmalar ham qatnashdi. Bu haqda Techcrunch.com xabar beradi.
Atech mijozlar tajribasi boʻyicha rahbari Gustav Hugodning tushuntirishicha, platforma ishlash prinsipi juda oddiy. Foydalanuvchilar kompaniya saytidan kerakli apparat toʻplamini xarid qilishadi. Shundan soʻng, brauzerda maxsus oynani ochib, sunʼiy intellekt chatbotiga oʻz gʻoyalarini tasvirlab berishadi. AI vositasi darhol kod generatsiya qilib, ishchi prototipni yaratishga yordam beradi.
Hugodning taʼkidlashicha, kompaniya foydalanuvchilari doirasi juda keng: “Bizda toʻrt yoshli bolalardan tortib, vodorod sintezi zavodlari uchun aniq kuchlanish datchiklarini talab qiladigan mutaxassislargacha boʻlgan mijozlar bor”. Ilgari apparat prototipini yaratish uchun oʻn yillik tajriba yoki qimmatbaho muhandislar xizmati talab etilardi, ammo endilikda bu jarayon sezilarli darajada osonlashmoqda.
“Dasturiy taʼminot sohasidagi qulayliklar ortgani kabi, apparat taʼminotini yaratishdagi qiyinchiliklar ham barham topmoqda. Demokratik dunyoda apparat vositalari barcha uchun ochiq boʻlishi kerak”, — deydi Gustav Hugod. Kompaniya jalb qilingan yangi mablagʻlarni tadqiqot va ishlanmalar (R&D), marketing hamda yangi xodimlarni yollashga sarflashni rejalashtirmoqda.
“Zamin”ni Telegramʻda oʻqing!
