Rossiyaning yangi Il-114-300 mintaqaviy turbovintli samolyoti Arktika zonasida sertifikatlashtirish sinovlarining navbatdagi bosqichini muvaffaqiyatli yakunladi. Sinov parvozlari Novaya Zemlya va Frans-Iosif Yeri arxipelaglaridagi aerodromlarda amalga oshirilib, samolyotning past haroratlar va murakkab navigatsiya sharoitlaridagi ishlashi tekshirildi. Bu haqda Ixbt.com xabar beradi.
Parvozlar davomida samolyotning umumiy parvoz xususiyatlari bilan bir qatorda, KRET kompaniyasi tomonidan ishlab chiqilgan BINS-2015 inersial navigatsiya tizimining samaradorligi baholandi. Mutaxassislarning ta’kidlashicha, samolyot 80-parallelgacha bo‘lgan hududlarda, ya’ni Shimoliy qutbga yaqin masofada o‘zining yuqori ishonchliligini namoyish etdi.
Il kompaniyasi boshqaruvchi direktori Daniil Brenermanning so‘zlariga ko‘ra, ushbu sinovlar Il-114-300 samolyotining Arktika hududlarida foydalanish uchun to‘liq yaroqli ekanligini tasdiqladi. Kelgusida ushbu layner eskirgan An-24 va An-26 samolyotlarini, shuningdek, xorijiy ATR-72 va Bombardier Dash 8 modellarini almashtirishi kutilmoqda.
Joriy yilda sinov dasturi davom ettiriladi: yoz mavsumida yuqori harorat sharoitida, kuzda esa tuproqli uchish-qo‘nish yo‘laklarida tekshiruvlar o‘tkazish rejalashtirilgan. Il-114-300 68 nafargacha yo‘lovchini tashishga mo‘ljallangan bo‘lib, u mahalliy avialiniyalarda foydalanish uchun maxsus ishlab chiqilgan.
“Zamin”ni Telegramʻda oʻqing!
