Sunʼiy intellekt sohasidagi Runway startapi Silicon Valley anʼanalaridan farqli oʻlaroq, oʻziga xos yoʻlni tanladi. Nyu-Yorkda tashkil etilgan ushbu kompaniya asoschilari Stenford yoki Google tajribasiga tayanmasdan, sanʼat maktabida tanishgan ijodkorlar sifatida ish boshlashdi. Bugungi kunda Runway sunʼiy intellekt kelajagini matn emas, balki video va dunyo modellari orqali shakllantirishni maqsad qilgan. Bu haqda Techcrunch.com xabar beradi.
Koʻpgina kompaniyalar, jumladan OpenAI va Anthropic, ChatGPT hamda Claude kabi til modellariga urgʻu berayotgan bir paytda, Runway boshqacha yondashuvni taklif etmoqda. Kompaniya hammuassisi Anastasis Germanidisning fikricha, sunʼiy intellekt rivojlanishining keyingi bosqichi insonlar tasvirlagan matnlardan emas, balki dunyoni kuzatish orqali olingan maʼlumotlardan iborat boʻlishi kerak.
2018-yilda asos solingan Runway oʻzining video yaratish modellari, xususan, Gen-4.5 texnologiyasi bilan tanildi. Kompaniya vositalari bugungi kunda kinoijodkorlar va reklama agentliklari tomonidan faol qoʻllanilmoqda. Lionsgate va AMC Networks kabi yirik media kompaniyalar bilan hamkorlik oʻrnatgan Runway, hatto “Everything Everywhere All At Once” filmi ustida ishlashda ham oʻz hissasini qoʻshgan.
Hozirgi kunda 5,3 milliard dollarga baholanayotgan Runway moliyaviy jihatdan ham muvaffaqiyat qozonmoqda. 2026-yilning ikkinchi choragida kompaniya 40 million dollarlik yillik takrorlanuvchi daromadga erishdi. Bu koʻrsatkichlar Runwayʼning nafaqat ijodiy, balki biznes nuqtai nazaridan ham sunʼiy intellekt bozorida jiddiy oʻyinchi ekanligini tasdiqlaydi.
“Zamin”ni Telegramʻda oʻqing!
