Apple Private Relay funksiyasida IP manzil sizib chiqishi aniqlandi

Apple kompaniyasining Safari brauzerida foydalanuvchilar maxfiyligini taʼminlashga moʻljallangan Private Relay funksiyasida jiddiy kamchiliklar aniqlandi. ixbt.com hamda 404 Media nashrlari tarqatgan maʼlumotlarga koʻra, ushbu himoya tizimini chetlab oʻtib, foydalanuvchining asl IP manzilini aniqlash imkonini beruvchi zaifliklar mavjudligi maʼlum boʻldi. Bu holat tarmqdagi maxfiylikka tayanadigan millionlab obunachilar uchun xavfsizlik masalasini yana-da dolzarb qilib qoʻymoqda. Bu haqda Techcrunch.com xabar beradi.

Tadqiqotchilar Talal Haj Bakry va Tommy Mysk seshanba kuni eʼlon qilgan blog-postida mazkur muammo iOS qurilmalaridagi barcha brauzerlar foydalanadigan WebKit veb-brauzer dvigatelining uchta xususiyati bilan bogʻliqligini tushuntirib berishdi. Ularning taʼkidlashicha, mazkur kamchilik tufayli maxfiylik vositasi oʻz vazifasini toʻliq bajara olmayapti va real tarmoq manzillarini oshkor qilib qoʻymoqda.

Maxfiylik va VPN farqlari

Mutaxassislar eslatib oʻtganidek, Private Relay odatiy VPN (Virtual Private Network) xizmati emas. VPN butun tizim darajasida maʼlumotlarni himoya qilsa, Appleʼning bu funksiyasi faqatgina Safari brauzeri doirasida ishlaydi. Shuningdek, xizmat faqatgina pullik iCloud+ obunachilarigagina taqdim etiladi. Shu boisdan ham, foydalanuvchilar oʻzlarining tarmoqdagi harakatlari toʻliq berkitilganiga ishongan holda xavf ostida qolishlari mumkin.

Muammoni fosh qilgan tadqiqotchilar maxsus veb-sayt ishga tushirishdi. Bu sayt yordamida har qanday foydalanuvchi oʻz qurilmasida Private Relay yoqilgan boʻlsa ham, asl IP manzili sizib chiqayotganini tekshirib koʻrishi mumkin. TechCrunch nashri xodimlari ham seshanba kungi test sinovlari chogʻida ushbu sayt ularning real IP manzilini muvaffaqiyatli aniqlagani amalda tasdiqlaganini maʼlum qildi.

Apple bilan munosabatlar va kelajakdagi choralar

Tadqiqotchi Tommy Mysk oʻzining X ijtimoiy tarmogʻidagi sahifasida ular bu zaiflik haqida Apple kompaniyasiga rasman murojaat qilmaslikka qaror qilganini yozdi. Uning soʻzlariga koʻra, avvalgi tajribalar kompaniya bilan muloqot oylar davomida choʻzilishi, xabarlarga eʼtiborsizlik bilan qaralishi va ayrim hollarda muammoning taʼsiri butunlay inkor etilishiga sabab boʻlgan. Hozircha Apple kompaniyasi ushbu holat yuzasidan rasmiy izoh bergani yoʻq.

Shunga qaramay, muammoni aniqlagan mutaxassislar oʻzlari ishlab chiqayotgan Psylo nomli shaxsiy brauzerda bu kabi IP manzil sizib chiqishining oldini oluvchi maxsus himoya choralarini qoʻshganliklarini maʼlum qilishdi. Texnologiyalar olamidagi bunday nosozliklar foydalanuvchilar maʼlumotlarini himoya qilish tizimlarini doimiy ravishda takomillashtirib borish lozimligini yana bir bor koʻrsatmoqda.