Ҳар йили 5 сентябрь бутун дунёда Халқаро хайрия куни сифатида кенг нишонланади. Бу сана бежизга танланмаган: айнан шу куни ўз умрини қашшоқ ва муҳтожларга ёрдам беришга бағишлаган буюк инсон – Тереза она ҳаётдан кўз юмган. У инсониятнинг юзидаги дард ва қийинчиликларни енгиллатиш учун бутун умрини бағишлаган, миллионлаб инсонларга умид бағишлаган.
Тереза она 1979 йилда Тинчлик учун Нобел мукофоти билан тақдирланган эди. Унинг фаолияти қашшоқликка қарши курашиш, эзгуликни кенг ёйиш ва инсонларга меҳр-шафқат кўрсатишдаги беқиёс хизматлари билан тарихга кирди. Унинг “Биз барча учун катта яхшилик қила олмаймиз, аммо кичик ишлар орқали катта муҳаббат кўрсата оламиз”, деган фикри бутун дунёда шиорга айланиб улгурган.
Халқаро хайрия кунининг асосий мақсади – жамиятда ижтимоий масъулият ҳиссини кучайтириш, хайрия тадбирларини қўллаб-қувватлаш ҳамда бутун дунё миқёсида қашшоқлик, очлик, таълим етишмаслиги ва саломатлик билан боғлиқ муаммоларга ечим топиш учун барчани бирлаштиришдир.
Бугунги кунда хайрия тушунчаси фақат моддий ёрдам билан чегараланмайди. Инсон ўз вақти, билимлари, тажрибаси ва ҳатто меҳрини ҳам хайрия сифатида улашиши мумкин. Масалан, кичик ёшли болага китоб совға қилиш, қариянинг юкини енгиллатиш ёки уйсиз ҳайвонга озиқ бериш – буларнинг барчаси чин маънода эзгулик ҳисобланади.
«Замин»ни Telegram’да ўқинг!
