Ўзбекистон 2025 йилнинг 1-чорагида 115 млн долларлик авто импорт қилди

Ўзбекистон 2025 йилнинг биринчи чорагида 115,1 миллион долларлик чет эл енгил автомобилларини импорт қилди, деб upl.uz сайти хабар берди.

Давлат статистика қўмитаси маълумотларига кўра, январь–март ойларида мамлакатга 6 950 та енгил автомобил олиб кирилган. Энг йирик етказиб берувчи давлат – Хитой бўлиб, у ердан 5 235 та авто келтирилган.

Иккинчи ўринда – Жанубий Корея, у 1 425 та автомобил экспорт қилган. Қолган давлатлар ҳиссаси қуйидагича тақсимланган: Ҳиндистон – 144 та, Япония – 77 та, АҚШ – 18 та. Яна 51 та машина бошқа давлатлардан олиб кирилган.

Бу кўрсаткичлар Хитойнинг Ўзбекистон авто бозоридаги позициясини мустаҳкамлаётганини кўрсатади. У бошқа экспортчилардан анча илгарилаб кетган.

Маълумот учун, 2024 йилда Хитой дунёдаги энг йирик автомобил экспортчисига айланган, Японияни ортда қолдирган. Ўзбекистон бозорида BYD ва Chery каби хитой брендлари замонавий технология ва арзон нархлар туфайли кенг тарқалмоқда. «Замин»ни Telegram’да ўқинг!