16:27 / 25.10.2022

Байденнинг партиядошлари уни Россия билан музокараларга чақирди

^{Фото: Picture Alliance}
30 нафар демократ конгрессмен АҚШ президентига мурожаат қилиб, Украинадаги урушни тугатиш бўйича Москва билан тўғридан тўғри музокараларни бошлашга чақирди. Бу Байденга партиядошлари томонидан курсни ўзгартириш бўйича биринчи марта мурожаат қилиши.

Бир гуруҳ демократ конгрессменлар АҚШ президенти Жо Байденга мактуб йўллаб, Украинадаги урушни тўхтатишга олиб келиши мумкин бўлган Россия билан тўғридан тўғри музокаралар ўтказишга чақирди. Мурожаат Прамила Жаяпала бошчилигидаги 30 нафар либерал демократ конгрессменлар томонидан тайёрланган, деб ёзади The Washington Post душанба, 24 октябр куни кечқурун мактуб нусхасига таяниб.

Хат муаллифларининг фикрича, Байден Украинага ҳарбий ва молиявий ёрдамни давом эттириш билан бир қаторда «сулҳни тўхтатиш учун реал асосларни» топиш учун Россия билан тўғридан тўғри музокараларни бошлаши керак, чунки ҳалокатли ва ҳисоблаб бўлмайдиган хавфлар билан узоқ давом этадиган уруш дипломатик ечимнинг муқобили бўлади.

Мурожаатни имзолаганларнинг фикрича, ҳадли шартлар урушни тугатиш учун бир қатор рағбатларни ўз ичига олиши керак, жумладан, Россияга қарши санкцияларни юмшатиш ва жаҳон ҳамжамияти билан биргаликда, биринчи навбатда украиналикларнинг ўзларига мақбул бўлган эркин ва мустақил Украина учун хавфсизлик кафолатлари ҳақидаги келишув.

The Washington Post таъкидлашича, Байденнинг бир гуруҳ партиядошлари биринчи марта уни Украинадаги урушга оид курсни кескин ўзгартиришга чақирмоқда.

Оқ уй ва АҚШ Давлат департаменти демократ конгрессменларнинг мактубини шарҳлар экан, улар Жо Байден ҳамон Россия билан тўғридан тўғри музокараларга қарши эканини очиқ айтди. Миллий хавфсизлик кенгашининг стратегик алоқалар бўйича координатори Жон Кирбига кўра, Украина иштирокисиз Россия билан музокаралар олиб бориш ҳамон имконсиз. Ўз навбатида, Давлат департаменти матбуот котиби Нед Прайснинг айтишича, АҚШ Россиянинг мулоқот ва дипломатик саъй-ҳаракатларга тайёрлиги бўйича ҳеч қандай аломат кўрмаяпти.

Қўшма Штатлар Украинанинг асосий иттифоқчиларидан бири бўлиб, унга кўп миллиард долларлик ёрдам, жумладан, ҳарбий ёрдам беради. Россиянинг Украинадаги тажовузкорлиги фонида Вашингтон Россияга қарши бир нечта санкциялар пакетини жорий қилди.