361
Украина президенти Владимир Зеленский Россиянинг Краснодар ўлкаси ва аннексия қилинган Қримни боғловчи Қрим кўпригини украиналик ҳарбийлар учун нишон деб билишини айтди. Бу ҳақда Зеленский Аспен хавфсизлик форумида сўзлаган нутқида гапирди.
Зеленскийнинг қўшимча қилишича, Қрим кўприги “кичик логистика йўли” бўлиб, ундан Россия қўшинлари Украинага зарба беришда ишлатиладиган ўқ-дорилар олиб ўтмоқда.
17 июлга ўтар кечаси Қрим кўпригида портлаш содир бўлди, бу кенг миқёсли уруш бошланганидан бери кўприкда содир бўлган иккинчи портлаш. Ҳодисада машиналардан бирида ўтирган эр-хотин ҳалок бўлди, уларнинг 14 ёшли қизи яраланди. Кўприкнинг автомобиль қисми шикастланди. Уни қайта тиклаш учун, Россия расмийларига кўра, бир миллиард рубль керак.
Баъзи ОАВ манбаларга таяниб, бу Украина хавфсизлик хизмати (УХХ) ва Украина ҳарбий-денгиз кучлари томонидан амалга оширилган махсус операция бўлганини хабар қилди, бироқ УХХ кўприкдаги ушбу ҳужум тафсилотларига аниқлик киритмади.
Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтди. У “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлишини таъкидлади.
Путин муносабати
Россия президенти воқеани “Киев режимининг террорчилик ҳаракати” ва “маъносиз жиноят” деб атади ва Қрим кўпригидан ҳарбий транспорт учун “узоқ вақтдан бери фойдаланилмаётганини” қўшимча қилди.
22:11, 8-05-2025
