Портлаш ва тутун акс этган илк фотосуратлар ва видеолар интернетда кун ўрталарида пайдо бўлди.
Кўп ўтмай аннексия остидаги Қримнинг Москва томонидан тайинланган раҳбари Сергей Аксенов кўприк ҳудудида «душманнинг икки ракетаси уриб туширилгани»ни маълум қилди. «Қрим кўприги шикастланмаган», — деган Аксенов.
Шу билан бирга, Қрим ҳудудини Россия билан боғловчи кўприкда иккитомонлама ҳаракат ҳам маълум вақтга тўхтаб қолди.
Аксеновнинг маслаҳатчиси Олег Крючков кўприк устида тутун ҳосил бўлганини «махсус хизматлар томонидан тутун пардаси ўрнатилгани» билан изоҳлади, у шунингдек «ҳаракат яқин вақтлар ичида тикланиши»га ваъда берган.
Кейинроқ Россия мудофаа вазирлиги зарба зарбдор вариантга айлантирилган С-200 зенит-ракетаси билан берилганини маълум қилди. Россия ҳарбий идорасига кўра, ракеталар ҳаво ҳужумидан мудофаа кучлари орқали тўхтатиб қолинган.
Маҳаллий вақт билан соат 16:00 атрофида Россия кўприкка навбатдаги ҳужум уюштирилгани ва Керч бўғози устида украинларнинг яна бир ракетаси уриб туширилганини маълум қилди.
Маълум вақт ўтгач кўприк бўйлаб ҳаракат тикланди, аммо унга киришда катта тирбандликлар юзага келди.
Кўприкнинг телеграм-каналдаги расмий саҳифасида айтилишича, соат 17:00 ҳолатига Россиянинг Таман шаҳри томондан кўприкка киришда 561 та транспорт воситаси навбатда турган, Керч томондан эса — 711 та. Россия расмийларига кўра, кутиш вақти икки соат атрофида бўлмоқда.
Украина Россиянинг Қрим кўпригига ҳужумлар бўйича хабарларини изоҳламади.
Зарбалар серияси
Ёз мобайнида Қрим кўприги ва Керч бўғози бир неча бор ҳужумга учради.
4 август куни россияликларнинг «Сиг» номли танкери Керч бўғози ҳудудида денгиз дрони зарбаси оқибатида шикастланди.
17 июл куни Керч кўпригига ҳам денгиз дронлари орқали ҳужум қилинганди. Автомобил кўпригининг иккита оралиқ ёпмаси зарарланган, икки киши ҳалок бўлганди.
Керч кўпригидаги илк портлаш 2022 йил 8 октябрида рўй берганди, ўшанда прицепли юк машинаси портлаши оқибатида автомобил кўпригининг учта оралиқ ёпмаси қулаб тушган, шунингдек темирйўл кўприги жиддий шикастланганди.
Киев бу ҳужумлар учун жавобгарликни тўғридан тўғри ўз зиммасига олмайди, аммо август ойи бошида Украина миллий хавфсизлик ва мудофаа кенгаши котиби Олексий Данилов украин махсус хизматлари Керч кўпригига ўтган йил октябрида ва 2023 йил июл ойи ўрталарида амалга оширилган ҳужумларга алоқадор эканини тан олганди.
Россия ва Украина уруши “Замин” янгиликларини “Одноклассники”да кузатиб боринг
