G7 давлатлари Россиянинг музлатилган активларини сақлаб туришга ваъда беради

^{Фото: Kyodo News}
Катта еттиликка аъзо давлатлар Россиянинг музлатилган активларини Украинага етказилган зарарни тўламагунча ўз юрисдикцияларида ушлаб туриш ниятида. Бу ҳақда G7 давлатларининг ташқи ишлар вазирлари 17 февраль куни Мюнхен хавфсизлик конференциясида берган маълумотларига таяниб, Deutche Welle хабар берди.

Баёнотга кўра, G7 аъзолари Украинага Россия Федерациясидан ўзларининг ҳуқуқий тизимлари ва халқаро ҳуқуқларга мувофиқ товон пули олишда ёрдам беришнинг барча мумкин бўлган усулларини ўрганишда давом этади. Европа Иттифоқи кенгаши Украинага Россиянинг музлатилган активлари билан ёрдам беришга рухсат берди. 12 февраль куни Европа Иттифоқи Кенгаши Россия Марказий банкининг музлатилган активларидан олинган фойдадан Украина фойдаланиши учун ҳуқуқий асос яратувчи резолюцияни тасдиқлаган эди. Ҳужжат Россия Марказий банкининг Европа Иттифоқи томонидан қўлланилган чеклаш чоралари оқибатида музлатилган активлар ва резервларга эга қимматли қоғозлар марказий депозитарийси мажбуриятларига аниқлик киритади.

Россия ҳарбийларининг Украинага бостириб кириши ортидан Брюссел Москвага қарши бир қанча санкциялар пакетини жорий қилган. Еврокомиссия маълумотларига кўра, Европа Иттифоқидаги чекловлар доирасида Россия Федерацияси Марказий банкининг 200 миллиард евродан ортиқ активлари блокланган. “Замин” янгиликларини “Telegram”да кузатиб боринг