Байден маслаҳатчилари Камала Ҳаррис Трампга қарши тура олмаслигини айтишмоқда

^{Фото: Google Images}
АҚШ президенти Жо Байден сайловолди пойгасидан чиқишга иккиланган, чунки у ва унинг маслаҳатчилари Камала Ҳарриснинг сайловда ғалаба қозона олмаслигидан хавотирда бўлган. Уларнинг фикрича, Камала Ҳаррис Дональд Трампга қарши тура олмаслиги мумкин, деб ёзади Axios учта манбага таяниб.

Нашрнинг ёзишича, келгуси ҳафта Демократик партиядан президентликка янги номзод бўлган Камала Ҳаррис учун ҳал қилувчи бўлади. Axios’нинг аниқлик киритишича, сиёсатчи унинг номзодлигига шубҳа қилаётган партия амалдорларини ишонтириши керак.

Нашр қайд этганидек, Билл ва Ҳиллари Клинтон каби баъзи демократлар Камала Ҳаррисни тезда қўллаб-қувватладилар. Аммо Вакиллар Палатасининг собиқ спикери Ненси Пелоси, Вакиллар палатасининг Демократик партияси етакчиси Хаким Жеффрис, Сенатдаги кўпчилик етакчиси Чак Шумер ва собиқ президент Барак Обама кабилар Ҳаррис номзодини қўллаб-қувватлашга шошилишмаяпти.

Эслатиб ўтамиз, сўровномаларда Дональд Трамп Жо Байден ва Камала Ҳаррисдан олдинда. Вашингтон Пост газетаси ўтказган 11 та сўровда ўртача ҳисобда Трамп 1,5 фоизга олдинда бўлган.

Кеча, 21 июль куни АҚШнинг амалдаги президенти Жо Байден президентлик пойгасидан чиқишини маълум қилди. Дональд Трамп билан муваффақиятсиз дебатдан сўнг Байден тарафдорлари уни президентлик сайловидан воз кечишга чақиришди. Байден Демократик партиядан вице-президент лавозимида ишлаган Камала Ҳаррисни номзод сифатида кўрсатишни таклиф қилди. «Замин» янгиликларини «Вконтакти»да кузатиб боринг