14:00 / 07.02.2025

Трамп маъмуриятининг кескин қарорлари намойишларни келтириб чиқарди (фото)

Доналд Трамп 2025 йил 20 январда, АҚШ президенти лавозимига киришгач, АҚШнинг ўзида ҳам, бутун дунё бўйлаб ҳам улкан резонанс кўтарган қатор қонунларни имзолади. Оқ уйдаги биринчи кунданоқ Трамп туғилган жойи бўйича АҚШ фуқаролигини беришни чеклашга қарор қилди (суд бу фармонни аллақачон бекор қилган), мигрантларни қабул қилиш ва бошпана тақдим этиш қоидаларини ўзгартирди, АҚШнинг Жаҳон соғлиқни сақлаш ташкилоти ва иқлим бўйича Париж келишувидан чиқиши ташаббусини илгари сурди, шунингдек бутун дунё бўйлаб фаолият олиб борувчи Халқаро тараққиёт агентлиги (USAID) орқали ёрдам тақдим этишни тўхтатди, деб ёзмоқда Kun.uz нашри.

Бундан ташқари, Трамп Канада, Мексика ва Хитой билан савдо уруши бошлашга тайёрлигини эълон қилди, трансгендер спортчиларга аёллар ўртасидаги мусобақаларда иштирок этишни тақиқлади, шунингдек, АҚШ ҳукумати фақат икки гендер — «эркак ва аёл»ни тан олишини билдирди. АҚШ янги президенти фаоллиги мамлакат чегараларидан ташқарига ҳам тарқалган, жумладан, у АҚШ Ғазо секторини «ўз назоратига олиш»га тайёрлигини маълум қилган.

SpaceX ва Tesla асосчиси Илон Маск раҳбар этиб тайинланган ва кенг ваколатларга эга бўлган Давлат самарадорлиги департаменти (DOGE) ҳам ўзини кўрсатмоқда.

Бунга жавобан ижтимоий тармоқларда иштирокчилари #buildtheresistance ва #50501 ҳештегларидан фойдаланиб, мамлакат аҳолисини Трамп ва унинг маъмурияти таҳдиди остида қолган демократия ҳимояси учун отланишга чақираётган «50501 ҳаракати» (50 намойиш, 50 штат, бир кунда) юзага келди. Улар Трамп сафдошлари томонидан ишлаб чиқилган «Лойиҳа 2025» деб номланган режани изчиллик билан амалга ошираётганини айтишмоқда. Шу билан бирга, CNN қайд этишича, Трампнинг ўзи бир неча бор бундай ҳужжат билан таниш эмаслигини билдирган.

«Медуза» «50501 ҳаракати» доирасида 5 феврал куни бўлиб ўтган акциялардан фотосуратларни тақдим этди.

^{Миннесота штати капитолийсидаги намойишчилар. Улардан бирининг қўлидаги плакатда шундай ёзилган «Илон Маск — даҳшатли президент». Сент-Пол, 2025 йил 5 феврал
Nick Wosika / Icon SMI / ZUMA Press / Scanpix / LETA}

^{Вашингтон штати маркази — Олимпиядаги намойишчилар. Плакатлар орасида қуйидагича ёзувлар бор: «Фашизмга қаршилик кўрсатинг», «Америка барчаники», «Тўнтаришни тўхтатинг. Ҳеч ким Маскка овоз бермаган» ва «НАТО, бизни қутқар».
Lindsey Wasson / AP / Scanpix / LETA}

^{Ню Йоркдаги акция иштирокчиси «Eat The Rich» ёзувли плакат кўтарган — бу анархистлар, сўллар ва антикапиталистик ҳаракатлар орасида машҳур ибора. Уни — «Бойларни еб қўй» деб таржима қилиш мумкин. 2025 йил 5 феврал
Edna Leshowitz / ZUMA Press Wire / Scanpix / LETA}

^{Америка ва Мексика байроқларини бирлаштирган намойишчи. Лос-Анжелес, Калифорния штати, 2025 йил 5 феврал
David Swanson / Reuters / Scanpix / LETA}

^{«Ирқчиликни — ватанпарварлик сифатида кўрсатишни бас қилинг» ва «Илтимос, тесламни trade-in орқали сотишга ёрдам беринг» — дейилган Лас-Вегасдаги намойишчиларнинг плакатларида. Невада штати, 2025 йил 5 феврал
John Locher / AP / Scanpix / LETA}

^{Филаделфиядаги намойишчилар, Пенсилвания штати
Matt Rourke / AP / Scanpix / LETA}

^{Ню Жерси штати пойтахти Трентондаги норозилик акцияси. «Демократия — автократия эмас» деб ёзилган ўнгдаги плакатда
Brian Branch Price / ZUMA Press Wire / Scanpix / LETA}