80 ёшли Ван Ванлин 700 болага ота бўлди

^{Фото: AP}
Хитойнинг шарқидаги Чжецзян провинциясида яшовчи 80 ёшли Ван Ванлин 700 дан ортиқ болага ота бўлди. У бутун умри давомида оила қурмаган, деб ёзади South China Morning Post.

Ван Ванлин 1979 йилдан бери уй-жойсиз ёки кўчада қолган болаларга ёрдам бериб келади. У илк бор 34 ёшида шундай болага дуч келган. Ўшанда 15 ёшли ўсмир алдов йўли билан кўмир конида ишлашга мажбур қилинган ва уйига қайтолмаётган эди. Ван унга поезд чиптаси олиб бериб, ҳаётини ўзгартирди.

^{80 ёшли Ванг Ванлин сўнгги қирқ йил ичида юзлаб йигитларга ёрдам берди. Фото: Доуйин}
Бу воқеа Ванлиннинг бутун ҳаётини ўзгартирди. Ёшлигида у ҳам қийинчиликларни бошдан кечирган — қўшниси уни ноҳақ ўғриликда айблаган ва у 16 йил мажбурий меҳнатга жўнатилган.

1978 йилда у озодликка чиқиб, заводда иш бошлади. Бир йил ўтиб эса, қийин аҳволдаги болаларга ёрдам бера бошлади. У уйсиз болаларни уйига таклиф қиларди, ойлик маошини эса уларнинг озиқ-овқат ва йўл харажатларига сарфларди. Ван болалардан фақатгина уйларига эсон-омон етиб борганликларини хабар қилишни сўрарди.

Ванлин оила қурмаган болаларни ўз ҳимоясига олди. Унинг саъй-ҳаракатлари туфайли Юй исмли 12 ёшли бола ҳаётда муваффақиятга эришди. У мустақил ҳаётга қадам қўйиб, оиласи учун икки қаватли уй қурди.

^{Ванг ўзи ёрдам берган кўплаб болаларнинг расмларини эсдалик сифатида сақлайди. Фото: Доуйин}
2022 йилда Юй Ван Ванлиннинг ёлғиз яшаб келаётганини билиб қолди ва унга ғамхўрлик қилиш вақти келганини тушунди. У ижтимоий тармоқларда Ванлиннинг ҳикоясини баҳам кўрди. Бу ҳикоя минглаб одамларни таъсирлантирди. Кўпчилик уни “улкан қалб эгаси” деб атади.

Бугунги кунда Ван Ванлин бир пайтлар ўзи қутқариб қолган 700 нафар боланинг хатларини сақлаб келмоқда.

^{Ванг, шунингдек, йиллар давомида ёрдам берган болалардан олган юзлаб хатларни сақлаб қолган. Фото: Доуйин} “Замин” янгиликларини “Telegram”да кузатиб боринг