Кичик Роберт Кеннеди АҚШ соғлиқни сақлаш вазири лавозимига тасдиқланди

^{Фото: Getty Images}
АҚШ Конгресси 13 феврал куни ўтказилган йиғилишда кичик Роберт Кеннеди номзодини мамлакат Соғлиқни сақлаш ва ижтимоий хизматлар вазирлиги раҳбари лавозимига тасдиқлади, деб хабар беради CNN.

Қайд этилишича, ушбу қарорни ёқлаб 52 нафар сенатор овоз берган бўлса, 48 нафар конгрессмен бунга қарши чиққан.

Доналд Трамп томонидан тавсия этилган Кеннеди номзодини барча демократ сенаторлар, шунингдек, республикачи Митч Макконнелл ҳам қўллаб-қувватламаган.

Reutersʼнинг ёзишича, конгрессменлар 71 ёшли Кеннеди номзодини Соғлиқни сақлаш вазири лавозимига икки кунлик эшитувлардан сўнг тасдиқлаган. Демократик партия вакиллари Кеннедини ҳаёт учун муҳим бўлган дори воситаларини шубҳа остига оладиган фитна назарияларини тарқатишда, шунингдек, вакцинацияга қарши курашдан молиявий манфаатдор эканликда айблаган. Кеннеди ушбу баёнотни рад этган. У мавжуд вакцинация дастурини ҳимоя қилишга ваъда берган.

Кичик Роберт Кеннеди — АҚШнинг 35-президенти Жон Кеннедининг жиянидир. 2023 йил октябрда у АҚШ президентлиги сайловларида мустақил номзод сифатида иштирок этишга қарор қилганди, аммо жорий йилнинг августида ўзининг сайловолди кампаниясини тўхтатиб, Доналд Трампни қўллаб-қувватлаган эди.

Сайловлардаги ғалабадан кейин Трамп Кеннедини Соғлиқни сақлаш вазирлиги раҳбари лавозимига илгари суриб, у «сурункали касалликлар эпидемиясига барҳам беришга ва Американи яна буюк ҳамда соғлом қилишга» қодир эканини маълум қилганди.

Декабр бошларида ўнлаб олимлар ва Нобел мукофоти лауреатлари АҚШ Сенатини кичик Роберт Кеннедининг соғлиқни сақлаш вазирлиги раҳбари лавозимига тайинланишига қарши овоз беришга чақирган эди. Олимлар Кеннеди АҚШда вакцинацияга қарши бўлган, ичимлик сувни фторлаш усулларини танқид қиладиган, шунингдек, ОИТС ва бошқа касалликларни даволашнинг муваффақиятли усулларига оид фитна назарияларини тарқатиб келадиган энг машҳур инсонлардан бири эканини эслатиб ўтганди. “Замин” янгиликларини “Telegram”да кузатиб боринг