Зеленский: АҚШ ҳарбий ёрдамисиз Киевнинг омон қолиши қийин масала

^{Фото: Getty Images}
Украинанинг АҚШ ҳарбий ёрдамисиз омон қолиши «жуда, жуда, жуда қийин» бўлади — ҳозир ҳам, у Россиянинг кенг кўламли босқинини қайтаришга ҳаракат қилаётганида ҳам, келажакда, уруш тугаганидан кейин ҳам. Украина президенти Володимир Зеленский 15 феврал, шанба куни NBC News телеканали ўз сайтида эълон қилган Meet the Press дастурига берган интервюсида шу ҳақда гапирди. Суҳбат хавфсизлик анжумани ўтаётган Мюнхенда ёзиб олинган.

Зеленский бошловчи Кристен Уэлкерга: «Америка кўмагисиз Россия билан жанг қилиш ҳақида ўйлашни хоҳламайман» деди. «Биз (АҚШ билан) стратегик шерик бўла олмаймиз деб ўйлашни истамайман», — дея қўшимча қилди у.

Зеленский: Путин ўт очишни тўхтатиш фонида баъзи санкцияларни олиб ташлашга эришмоқчи

Зеленский, агар Қўшма Штатлар унга ҳарбий ёрдам кўрсатишда давом этмаса, Киев келажакда Россиянинг навбатдаги йирик ҳужумига дучор бўлишини айтди. Украина раҳбарининг сўзларига кўра, Россия президенти Владимир Путин музокара столига урушни тугатиш учун эмас, балки Россияга қарши баъзи халқаро санкцияларни бекор қиладиган ва ҳарбий кучларининг қайта тўпланишига имкон берадиган ўт очишни тўхтатиш келишувига эришмоқчи.

«У (Путин) ҳақиқатан ҳам шуни хоҳлайди. У танаффус қилишни, тайёргарлик кўришни, машғулотларни ўтказишни, ўт очишни тўхтатиш фонида баъзи санкцияларни олиб ташлашни хоҳлайди», — дея ишонч билдирди Украина давлати раҳбари. “Замин” янгиликларини “Telegram”да кузатиб боринг