Аляскадаги орол аҳолиси Россия босиб олишидан қўрқиб, рус тилини ўрганмоқда

Аляскадаги Кичик Диомид ороли аҳолиси Россия ушбу ҳудудни қўшиб олишидан хавотирланиб, рус тилини ўрганишни бошлади, деб The Economist нашри хабар берди. Журналнинг маълум қилишича, орол Россиянинг энг шарқий нуқтаси — Ратманов оролидан бор-йўғи 3,5 километр узоқликда жойлашган.

Журналистлар Кичик Диомидда яшовчи тахминан 100 нафар аҳолининг кундалик ҳаётини тасвирлаб, оролни Россия ва АҚШ ўртасидаги “Арктика жангининг олдинги чизиғи” деб аташган.

«Оролнинг баъзи аҳолиси Россия қачондир уни қўлга киритишидан хавотирланиб, рус тилини ўрганмоқда», — дейилади хабарда.

Қиш фаслида икки орол ўртасида муз устида пиёда юриб ярим соатда етиб бориш мумкин. Илгарилари, хусусан совуқ уруш бошлангунга қадар, бундай алоқалар кенг тарқалган эди. Аммо ҳозирги мураккаб геосиёсий вазият туфайли бу алоқалар тўхтаб қолган ва орол аҳолиси фақат бир-бирини узоқдан кузатиш билан чекланмоқда.

«Биз уларни кузатамиз, улар эса бизни», — дейди Кичик Диомидда яшовчи Эдвард исмли фуқаро.

Шу билан бирга, маҳаллийлар орол секинлик билан, йилига 1-2 метрга Россия ороли томон ҳаракатланаётганини айтишмоқда. «Ороллар ниманидир тўғирлашга уринмоқда. Балки улар бир-бирини яхши кўрар?», — дейди маҳаллий аҳоли вакили. “Замин” янгиликларини “Telegram”да кузатиб боринг