Зеленский Путиннинг тўғридан тўғри музокаралар ўтказиш таклифига қандай жавоб қайтарди?

Украина президенти Владимир Зеленский мамлакатнинг Россия билан тўлиқ ва узоқ муддатли тинчликка эришиши учун муҳим қадам қўйишга тайёрлигини эълон қилди. У ўзининг Telegram-каналида Россия томони 12 майдан бошлаб тўлиқ, ишончли ва узоқ муддатли оташкесимга розилик беришидан умид қилмоқда эканлигини ёзиб қолдирди.

«Россияликлар ва ниҳоят урушни тўхтатиш ҳақида ўйлай бошлашгани яхши аломат. Жаҳон ҳамжамияти буни узоқ вақтдан бери интиқлик билан кутяпти. Урушни ҳақиқатда якунлаш йўлидаги илк муҳим қадам — бу ўт очишни тўлиқ тўхтатишдир», — деди Зеленский ўз баёнотида.

Украина президенти офиси раҳбари Андрей Ермак ҳам оташкесимни дастлабки 30 кун давомида амалга оширишга тайёр эканликларини тасдиқлади ва бу жараён тинчлик музокаралари билан давом этишини таъкидлади: «Аввалига 30 кунлик сулҳ, кейин эса тинчлик учун барча масалалар муҳокама қилинади», — деди Ермак.

Шуни қайд этиш керакки, Зеленский ҳам, Ермак ҳам Россия президенти Владимир Путин томонидан таклиф қилинган тўғридан-тўғри музокаралар борасида ўз баёнотларида алоҳида тўхталмаган.

Аввалроқ, 10 май куни Киев шаҳрида Франция президенти Эммануэл Макрон ва Европа Иттифоқи давлатлари раҳбарлари билан учрашув бўлиб ўтган эди. Ушбу учрашув натижаси ўлароқ, Киев расмийлари 12 майдан бошлаб қуруқлик, ҳаво ва денгиздаги барча ҳарбий ҳаракатларни камида 30 кун муддатга тўлиқ ва шартсиз тўхтатишга тайёр эканини расман маълум қилган эди. АҚШ президенти Дональд Трамп ҳам ушбу ташаббусни қўллаб-қувватлаган.

Бироқ Россия томонидан ҳозирча аниқ жавоб берилмаган. Россия президентининг матбуот котиби Дмитрий Песков Москва 30 кунлик ўт очишни тўхтатиш бўйича таклиф устида ўйлаётганини маълум қилган ва шу билан бирга, Россияга халқаро босим ўтказиш ҳаракатлари самарасиз эканини таъкидлаган эди.

Шундан сўнг, 11 май куни кечаси Владимир Путин махсус матбуот анжумани ўтказиб, Киевга 15 май куни Истанбул шаҳрида тўғридан-тўғри музокараларни қайта тиклашни таклиф қилди. Бироқ Путин ўзининг ушбу чиқишида Украина ва Европа давлатлари томонидан илгари сурилган 30 кунлик оташкесим ҳақидаги ташаббусга аниқ муносабат билдирмади.

Таҳлилчиларнинг фикрига кўра, ушбу музокаралар амалга ошса, бу икки мамлакат ўртасидаги узоқ муддатли ҳарбий можарони тинч йўл билан ҳал қилиш учун муҳим қадам бўлиши мумкин. Халқаро ҳамжамият эса Москва ва Киевдан тинчлик йўлидаги янги ташаббусларни кутиб қолмоқда.

Zamin.uz таҳририяти вазиятнинг ривожини кузатиб, тинчлик жараёни ҳақидаги хабарларни ўз ўқувчиларига мунтазам етказиб туради. «Замин»ни Telegram’да ўқинг!