«Ўргимчак тўри» операцияси: Россия қандай жавоб беради?

Украина Россия ҳарбий аэродромлари бўйлаб «Ўргимчак тўри» операцияси ўтказганига уч кун бўлди. Бу вақтга келиб дронларни Россия ҳудудига олиб кирган юк машинаси қандай ҳаракатни бошлагани-ю, самолётлари ёниб кул бўлган аэрдромларнинг коинотдан олинган суратларигача тарқалиб бўлди. Россия бу сенсацион операцияга қандай жавоб бериши охирги кунларнинг асосий муҳокама мавзуси бўлмоқда.

Путин жим

Россияликлар Украина фронтда, умуман, урушда қандайдир муваффақиятли юриш қилса, доимгидек Владимир Путиннинг реакциясини кутишади. Лекин биз анча йиллардан буён Владимир Владимировичнинг ҳаракатларини кузатувчилар унинг қарор қабул қилишига қандайдир ташқи омил деярли таъсир қилмаслигини биламиз.

Путин руслар орзу қилаётганидек Украина бўйлаб ядровий зарбага буйруқ бериши ҳам мумкин, лекин бунга уни Киевнинг ҳеч қайси ҳаракати мажбур қилолмайди. Путин Украина нимадир қилгани учун бирор чора кўришни улар билан ҳисоблашиш деб билади. Зеленский бошчилик украинлар билан ҳисоблашишни эса Россия президенти ўзига эп кўрмайди.

Украина «ўйинчоқ дронлар» билан Россия стратегик бомбардимончиларини йўқ қилганига Путин ҳозирча муносабат билдиргани йўқ. Масалан, Россия президенти ўшандан кейин Никол Пашинянни туғилган куни билан табриклади, Бойқўнғир космодроми очилганининг 70 йиллиги муносабати билан табрик йўллади, Россия болалар ҳуқуқлари бўйича вакил билан, кейин Россия табиат ресурслари вазири билан мулоқот қилди. Хусусан, ўрмон хўжаликларининг иқлим ўзгаришига мослашиши, коммунал чиқиндилар билан ишлаш каби мавзуларни гаплашди.

Путин Украина ҳужум қилиши биланоқ телевизорга чиқиб «Энди мана бундай қиламиз», «Энди фалон ракетани отамиз», дейишини кутганларга шунчаки Путинни яхши билмайдиган одамлар деб таъриф бера қоламиз. Путин ҳеч қачон бундай қилмайди, у сиз ўйлаганингиздан анча совуққон ва мулоҳазали инсон. Путин учун энг катта табу душман уни ғазаблантирганини тан олишдир. Ахир Россия президенти ўз туғилган кунида Қрим кўприги портлатилганида ҳам хотиржамликни сақлаб қолганди.

«Ядровий зарба бериш керак»

Россия жамиятида «Паутина» операциясини оғриқли қабул қилишди. Бу кўпроқ руҳий ҳужум бўлди. Чунки Украина арзонгаров дронлар билан Россия авиациясига 7 миллиард доллар зарар етказгач, Россияда нон, гўшт, тухум, гречка ёки ароқ қимматлаб кетгани йўқ. Россияликлар маошини ҳам вақтида олмоқда. Шаҳарлар ҳамон хавфсиз, Украина шаҳарлари билан таққослаганда, албатта.

Умуман, Украина бу операция билан руслар ҳаётини ўзгартириб юборгани йўқ. Лекин мана шу сокин ҳаёт кечираётган одамлар телевизордаги гапларни йиллар давомида эшитавериб уруш бошлангач, украинларни «миллат эмас», Украинани «сохта давлат» дейишга одатланишди. Улар урушга қарши дўстларига «Россияга қарши НАТО ва Америка урушяпти, Украинанинг қўлидан ҳеч нарса келмайди», деб тортишиб қўйган. Лекин мана, Трамп келгач ярим йилдан буён Украина гигант қўшниси билан ёлғиз урушмоқда. Етмаганига арзонгаров «ўйинчоқ дронлар» билан Россия стратегик самолётларини йўқ қилди.

Ҳа, ана шу «сохта давлат»нинг Россия олий минбарларида камситиладиган вакиллари Россия жамиятига жуда кучли руҳий зарба берди.

Оқибатда россияликлар энди «верховний»дан ядровий зарба талаб қилмоқда. Ҳа, бундай талаблар машъум 24 февралдан бошлаб юзлаб марта янграган, лекин бу гал айниқса баландроқ талаб қилишяпти. Путин яқиндагина Павел Зарубин билан интервюда Россия ядро қуроли ишлатишига эҳтиёж бўлмаганини айтиб, «Энди ҳам бўлмаса керак», деганди. Лекин у вақтда Россия етарлича устун позицияда эди. «Паутина» операцияси худди Херсоннинг ярми қайтиб олиниши ёки Харкивдаги қарши ҳужум даврида бўлгани каби рақибидан ҳарбий жиҳатдан минг чандон кучсиз бўлган Украинани музокараларда руҳий устун позицияга олиб чиқди. Вақтинча бўлса ҳам.

Футболчасига айтганда, майдонда уч киши кам бўлиб қолган, дарвозасида ҳам ҳимоячи турган, буткул ҳолдан тойган Украина жуда кучли, ҳали бардам Россияга қарши ўйинда бурчак зарбасидан ҳисобни тенглаштирди. Ҳа, қолган дақиқаларда катта эҳтимол Украина ҳисобни ушлаб қололмайди, лекин айнан ҳозир таблода ҳисоб тенг, руҳий устунлик Киевда. Тахминан шунақа вазият ҳозир урушда...

Жавоб бўладими?

Россия собиқ президенти Дмитрий Медведев ўз каналида пост қолдирди. «Қасос олинишини кутаётган барчага», деб бошлади мурожаатини собиқ президент. «Портлаши керак бўлган ҳамма нарса, албатта, портлатилади. Йўқ қилиниши керак бўлганлар йўқ бўлади», деди Медведев.

Эътибор қилган бўлсангиз, ҳатто Медведев «Ўргимчак тўри» операциясига нисбатан хотиржам муносабат билдирди.

Ҳужумдан бир кун ўтиб Россия Украинага уруш бошланганидан буён илк марта «Кинжал» ракетасини ташлади. Бу Россия арсеналидаги энг қўрқинчли ракеталардан бири бўлиб айнан стратегик самолётлар олиб учадиган қурол. Бу зарба билан Россия «Мана, стратегик авиация билан ҳаммаси жойида», демоқчи бўлди гўё.

Лекин уруш тарафдорларининг бу «Кинжал» билан ҳовури босилмади. Шу сабаб катта эҳтимол Киевга жавоб зарбаси берилади. Ҳеч бўлмаса ултрапатриотлар ҳовурини босиш учун. Балки яна бирор ерга руслар яхши кўрадиган «Орешник» ракетаси ташланар. Лекин ядровий зарба берилмаслиги аниқ. Чунки Путин шундоғам музокаралар ёрдамида ўз фойдасига ҳал қилиш эҳтимоли юқори бўлган урушни мураккаблаштириб юборишни истамайди...

«Замин»ни Telegram’да ўқинг!